Ramri hmasawn nan hma la turin phût

MZP Gen. Hqrs hruaitute chuan July 3, Inrinni khan tun hnaia Mizoram leh Assam intihbuaina Vairengte Aitlang an tlawh a; ramri hmasawnna leh ramri hauh chungchangah chak lehzuala hma la turin Mizoram sorkar an phût.

MZP chuan thuchhuah siamin, Aitlang chu kum tam tak kal ta aṭanga Mizote'n an luah ṭhin leh tunah pawh Vairengte khaw mite'n huan thlai an enkawl mekna a nih thu an tarlang a, "Assam police-te'n hnehchhuhin an luah lui a. Mizo kut hnathawka eizawngte huan thlai tihchhiatsak a ni leh an rante thlenga suasam a ni te, thlai leh ran neitute'n an eizawnna enkawl zui ngam loa an kalsan a ngai hi rilru natthlak kan ti hle a ni," an ti.

Ramri chungchanga buaina a chhuah apiangin Mizoram sorkar leh sipaite a che tlai zawk leh a tlem zawkah an ṭang zel tih sawiin MZP chuan, "A chan chhe zawkah an ṭang fo mai hi MZP chuan hriatthiam harsa kan ti hle," an ti a; Mizoram chàn zel loh nan ramri hmasawnna leh ramri hauh chungchangah chak lehzuala hma la turin MZP chuan Mizoram sorkar an phût a ni.