Hripui donaa sorkar hmalakna a ṭha - MNF All NGO & party meeting kohah sorkar an fak

MNF party chuan thuchhuah siamin, Mizoram sorkarin tlawmngai páwl leh political party hrang hrangte ko khawma Covid-19 do dan tur a sawipui chu fakawm an tih thu leh, hripui donaa sorkar hmalaknate chu ṭha an tih thu an tarlang.

MNF chuan, Covid-19 dona chungchang rêlnaah Health Minister hoin ṭhutkhawmnaa a tel àwm tak hlîr an tel ṭhin tih sawiin, a ṭul chángin minister dangte an tel a, kár âwl awm lo lêkin meeting an nei ṭhin niin an sawi a ni.

Health Minister hoa meeting-te chu zavai huap aiawh roreltu anga pawm thei lo mimal leh páwl an awm nia sawiin MNF chuan, "Min ko tel duh lo, min thawhpui duh lo, all party meeting ko rawh se, tia thu vawrh darhtu an awm chàmchí a. Central YMA hnen hial thlengin, CYMA chuan joint meeting a koh phah ta hial niin a hriat a, chutah chuan all party meeting neih ni se tia rêl a ni," an ti a; chu chu MNF sorkarin ngai pawimawhin Chief Minister kaihhruainain July 2, 2021-ah meeting koh a ni tih an sawi.

MNF party chuan, "Meeting-ah hian sorkarin tih àwm tak sorkarin a tih loh rawtna thar leh ṭha sawi chhuah tur nei ṭeuh anga lang, sorkar hmalakna duhkhawp lo ang ziazánga sawisel tur dap rengte tel ve chuan thil thar danglam, tuna Covid dona sorkarin kalpui mek dan aia ṭha leh hlawhtling zawk tur, tidanglam dâwrh thei rawtna thar sawi chhuah a awm lutuk lem lo niin a hriat," an ti.

All NGO & party meeting-ah pawl leh party aiawhte'n rawtna thar danglam tak an siam lo nia sawiin MNF chuan, "An rawtna siam ve te, ṭha an tih tlànte chu sorkarin ruahmanna siamin a bawhzui dawn tho tih hriat a ni," an ti a; thil tih rem lo leh tih chi loh a awm thei tih hriat a ṭul thu an tarlang.

MNF chuan, Covid-19 donaa sorkar hmalak dan chu a ṭha thawkhat hle nia sawiin, "Sorkar hian a ngaihna leh a nachang a hre hle. Chutih rualin, mipui pawhin mawhphurhna sang tak kan nei ve tih kan hriat tlàn a pawimawh. Mi dangte thuràwn leh mipui aw ngai pawimawhtu MNF sorkarin all party, all NGO joint meeting a ko hi kan chhuang a ni," an ti.