Beisei loh lam aṭangin cheng vaibelchhe tél a rawn lut zel - Chief Minister

Hunthar Venga lei tlahniam ṭhin chu chief minister Zoramthanga'n nimin zing khan a hmunah a enfiah a; Mizoramah beisei loh lam aṭangin cheng vaibelchhe tél a rawn luh mek zel thu a sawi.

Chief Minister chuan, lei tlahniam ṭhin chu kawng bul vel mai aṭanga siam ṭha loin, kawng thlang luikawr bul (a foundation) aṭanga dâwm chhoin hmalak tum mek a nih thu a sawi a, "Fûr thlen hma ngei hian theih ang anga hmalak nghal tum a ni. He kawngpui hi kan lifeline pawimawh em em a ni a, siamṭhat vat vat a ngai. Tuna siamṭhatna atana sum dah hi a beitham deuh avangin a dang kan dil leh mek a, a hlawhtlin ngei kan beisei. Fûr thlen hma ngei hian kan state sum pawh a awm ang ang kan hman a ngai ang," a ti.

Mizoram lei a ngheh loh thu sawiin Zoramthanga chuan, "Mizoram hmun dangah pawh lei chê leh tlahniam a tam a, siamṭhat hna kan thawk zel dawn. Central lamah pawh sum kan dil a, Pathianin mal min sawm a, beisei loh lam aṭangin cheng vaibelchhe tél a rawn lut mek zel. Ka hriat rûk danin, Amit Shah-a'n ministry hrang hrangte hnenah 'Mizoram ngai pawimawh rawh u' a ti emaw ni, min ngai pawimawh," a ti a; nimin lawkah pawh cheng vbc. 4000-5000 vel hmuh a nih thu a sawi.

Chief Minister chuan, cheng vbc. 4000-5000 chu sport, tourism leh thil danga hman dan tur minister-te nen an sawiho nghal dawn thu a sawi a, "Central sorkar khu kan sum hnár an ni a, kan mamawh a, min mamawhna chin pawh a awm ve. State budget piah lam sum min pe mek zel hi a lawmawm hle a ni," a ti. Sorkar thuchhuah tarlan danin, Hunthar Venga lei tla­hniam ṭhin vanga harsatna thleng ṭhin sukiang turin ṭhuang thuma hmalak tum a ni. NH-54 kawngpui chung lam zawng chu Disaster Management & Rehabilitation department hmalaknain pile foundation leh SDA sak te, drainage (tui luankawr) siam te, lungrem te, shaft well siam leh a dangte thawh tura duan a ni a; National Disaster Management Authority aṭanga sum hmuh hmangin hna thawh a ni ang.

Kawngpui thlang lam zawng chu state sum hmangin PWD hma­lak­nain counterfort retaining wall siam hna thawh ṭan a ni tawh a; Vaivakawn lui leh biak-in luiah link drain siam tura hmalak a ni bawk. Chief Minister hi bialtu MLA Lalmuanpuia, PWD engineer-in-chief K Lalsawmvela, Aizawl DC Vanlalngaihsaka leh Disaster Management & Rehabilitation department hotute'n an ṭawiawm a ni.