Halpuah hâl mi 11 man an ni Boruak a rálmuang - Aizawl SP

Aizawl district-a police-te chuan Krismas leh kum thar vuakvetah hâlpuah leh a kaihhnawih lam chi hâl mi 11 an man. Police hotute chuan, kumin hunpui vuakvêt chu a ralmuang thawkhata an ngaih thu an sawi.

Vanglaini palai zawhna chhanga Aizawl SP Neihchungnunga a sawi danin, hâlpuah leh a kaihhnawih dangte hâl vangin Aizawl Police Station huam chhungah mi paruk, Bawngkawn PS huam chhungah mi pakhat leh Kulikawn PS huam chhungah mi pali man an ni a, an vaiin mi 11 an ni. Hâlpuah hâl vanga mante hi an hâlna veng khawtlang hruaitute'n an hâl ngei tih police hnena an thlente an ni.

Halpuah leh a kaihhnawih vanga mante hi Court-in an chungthu a rél dawn a, Rs. 1,000 chawi emaw, thla ruk thleng jail-a tàntir theih a ni.

Vanglaini palaiin Aizawl khawpui a fan kualnaa a hmuh danin, kum hlui thlah zan hma lamah chuan hâlpuah leh a kaihhnawih hâl ri hriat tur leh hmuh tur a awm meuh lo. Kum hlui thlah zanah erawh chuan hmun tam takah an hâl nasa a; hâl meuh lohna veng a awm nual bawk.

Aizawl SP chuan, hunpui hman zawh takah buaina lian tham a thleng lo tih a sawi a, "Zu rûi buaina siam mi tlem tê man an ni a, buaina lian tham thleng a awm lo. Kumin hunpui chu a rálmuang hle a ni," a ti.

Kulikawn leh Bethlehem Vengah hâlpuah hâl a ni lo tih sawiin Aizawl SP chuan fakawm an tih thu a sawi a, "Hunpui kan hman zawh taka buaina lian tham a awm lo hi a lawmawm hle," a ti. Boruak muanawm chhan chu veng tin khawtlang hruaitute leh mipuite ṭanrualna vang a nih thu a sawi.

Hetih lai hian, Aizawl district-a police-te chuan nimin khan SP conference hall-ah kum thar atana infuihtharna hun an hmang a, hna thawh zel dan tur an sawiho nghal.

Aizawl SP Neihchungnunga chuan, police-te chu inthlahdah lo a, ṭhahnemngai taka thawk zel turin a chah a, "Police officer ṭhenkhatte an awmna hmun sawn ni mah se, an tih dan ṭha entawn a, thil thlengte hmachhawn zel tur a ni," a ti.