KHAWTHLIR

IPR Director thar
IPR department director thar David L Thangliana chuan nimin aṭang khan a pisa a luah ṭan. Department-a thawkte fuihna thu sawiin, ṭhahnemngai taka ram leh mipui tana thawhpuiah a sáwm a, "Pathianin eizawnna tura hna min pek hi a rawng kan bawlna a ni. Taima taka thawk tur leh mipui nena inhne renga thawk kan nih hriain, mi dangte tana malsawmna nih i tum ṭheuh ang u," a ti.ṭ

UPC inkhawmpui
United Pentecostal Church (UPC) Australia Conference chu January 2, Thawhlehni khan Canberra-ah ṭan a ni a, UPC (NEI) aṭangin general superintendent Rev. Lalmalsawma pawh a tel. Inkhawmpui hian January 6 thleng a awh ang.

Heroin man
Champhaia Excise & Narcotics department enforcement-te chuan January 2, Thawhlehni khan New Champhaiah heroin gram 27.6 an man a, a neitua puh Biakluaimanga (28) s/o Vanlaltlana, Zokhawthar nia inchhál an man nghal. Champhaia END hian December 29, 2017 zan dar 6:30 khan Champhai leh Zokhawthar inkarah heroin gram 40.1 leh a neitua puh Lalremsanga (27) s/o Lalnunzira, Damparengpui nia inchhál an man bawk.

Thingpui inho
Mizorama Secretariat pahniha thawktute chuan nimin khan kum thar thingpui inhona hun an hmang a, New Secretariat Complex-ah chuan chief secretary Lalmalsawma hoin thawktute an inhmukhawm a ni.

MJA Siktui Thiang
Champhai District MJA-in a kum 30 a nih lawmna chi khat atana vantlang tana tui thianghlim in tur Darthang­vunga Traffic Point, Champhai Vengthlang Presbyterian biak-in tuala Rs 1, 81,500 senga an siam, 'MJA Siktui Thiang' chu December 31, 2017 khan Champhai DC Vanglalngaihsaka'n vantlang hman theih tur­in a hawng. MJA Siktui Thiang siamna tur hian vonvergent sum hmangin Champhai BDO aṭangin Rs 1,00,000 ruahman a ni a, a bak zawng chu Champhai MJA-in an tum a ni.