VANGLAINI chawlh chhunga thil thlengte

December 23
l Traffic Management Coordination Committee ruahman angin chawhma dar 10 leh tlai dar 4 inkarah Aizawl khawpui laili, Zodin Square leh Chanmari kawn inkarah lirthei kal phal lohna hmun, No Vehicle Zone siam a ni. No Vehicle Zone chhungah hian lirthei tlan phal a ni lo a, thirsakawr leh nawrlirhte pawh luh phal a ni lo. Kum danga la tih ngai loh angin, No Vehicle Zone huam chhung kawngpui sirah thil zawrh phal a ni a, mi eng emaw zatin thawmhnaw leh thil dangte an zuar a ni.

l Governor Lt. Gen. Nirbhay Sharma-a'n Kohhran Thianghlim biak-in, Solomona Temple a tlawh a, a nupui Jyotsna Sharma-i'n a ṭawiawm. Larsapte nupa hi Kohhran Thianghlim executive chairman Dr LB Sailo leh hruaitu dangte'n an lo dawngsawng a, biak-in chhung leh a velte fangin, tualchhung kohhran hrang hrangin an chei mawite a en a ni. Larsap chuan, Mizo zinga awm nuam a tih thu te, khaw­tlang inkaihhruaina leh inrelbawlna felfai tak bakah, kohhran inrelbawlna fel tak a awm chu Mizoram tinuamtu a nih thu te, hnam intihbingna awm lo leh sakhua vanga inthliarna awm lo nun chu lungrualna leh hmasawnna thlentu a nih thute a sawi.

December 24
l Zanah police-te'n an thu dawn bawhzuiin, New Market area-a kudam pakhatah hâlpuah leh hâlmawi eng emaw zat an man. Thu dawn danin, hâlpuah leh hâlmawi an man hi báwm 4,276 a ni a, Aizawla an hralhna anga chhûtin Rs. 50,000 vel hû a ni. A neitu pakhat zawk Nasir Uddin (18), Karimganj man tel a ni a, a neitu dang pakhat erawh a tlanchhiat hman avangin man ve nghal a ni lo.

l Krismas urlâwk zanah Mizoram hmun hrang hrangah lirtheia chetsualna leh ruih theih thil vanga buaina leh harsatna lian tham thleng a awm lo. Thu a dawn danin, urlâwk zanah hian boruak a rálmuang a, hâlpuah ri hriat tur a awm meuh lo.

Urlâwk zanah hian Aizawl Police Station huam chhungah mi 14 man an ni a, ruih vanga intibuai leh chhungte tibuaite an ni hlawm. Bawngkawn PS huam chhungah mi pali man an ni a, an zinga pathum chu zu ruih vanga man niin, pakhat chu motor rûk vanga man a ni. Kulikawn PS huam chhungah zu rûi buaina siam mi panga man an ni a; Vaivakawn PS huam chhungah zu rui 13 man an ni bawk.

Lunglei PS huam chhungah rûkrûk vang­in mi pathum leh zu rûi pakhat man an ni a; Siaha, Lawngtlai, Serchhip, Champhai, Kolasib leh Mamit khawpuiahte zu rûi man tlem azawng an awm bawk a ni.

December 25
l Krismas ni a ni a, Mizoram hmun tinah kohhrante'n hlim takin an lâwm. Kohhran tam zawk chuan Krismas ni-ah hian ruai

ṭheh lohin, Pathianni angin an serh a, chhun leh zanah inkhawm an nei hlawm. Krismas lawmna ruai ṭheh nghal an awm nual a; chu'ng zingah chuan UPC kohhran hrang hrangte'n ruai an ṭheh a ni.

Aizawla 46th. Assam Rifles sipaite pawhin Lammualah Krismas lawmna hun an buatsaih a, Governor Lt.Gen. Nirbhay Sharma-a'n a hmanpui. He hunah hian zaipawl hrang hrang an zai a, Rev. Vanlalbela’n Krismas thuchah a sawi bakah, Assam Rifles 23 Sector DIG Brig. MS Mokha leh 46 AR commandant Col. Pratyush Kumar Singh Gau te pawhin thu an sawi a ni.

l Kidron Valley, Chawlhhmuna Kohhran Thianghlim biak-in pui ber, Solomona Temple chu an kohhrana executive chairman Dr LB Sailo-in a hawng. Solomona Temple hawnnaah hian Mizoram chhung leh páwn aṭangin an member mi ṭhahnem tak an tel a, biak-in thar lawmna thingpui ruai an kilho a ni.

Solomona Temple hi Mizorama biak-in lian ber leh a sakna senso pawh tam ber a ni a, ram acre 1.99-a zau chhungah RCC-in ft. 180 biala sak niin, a hulhliap tel loin a chhung zau zawng chu ft. 120 bial a ni. Biak-in chhungah mi 3,000 an ṭhu thei a, a sak nan cheng vbc. 18 leh hnatlang thâ 3,00,000 sen a ni a, kum 1994-a sak ṭan a ni.

December 26
l Mizoram hmun hrang hrangah Krismas lawmna ruai ṭheh a ni a, kohhran ṭhenkhat, Krismas ni-a ruai ṭheh zingah ruai nawn an awm bawk.

l Zan dar 9:30 velah Aizawl district-a NE Tlangnuam khuaah G Suanthanga in a kâng a, bungraw chuh hman lohin a kâng ral. In kan ṭan laiin a neitu Suanthanga te chhungkua chu Krismas zai khawmna hmunah an awm a, in a kâng tih hriat a nih veleh ṭhelh tum ni mah se, an ṭhelh thei lo a ni. A tukah khawtlangin Suanthanga chhungkaw chenna tur in an saksak nghal a, in sak hnatlangah hian an khaw ṭhenawm - Khawlian leh Daido aṭang pawhin mi eng emaw zat an thawk chhuak a ni.

December 27
l Chief minister Lal Thanhawla'n CMO Conference Hall-ah Project Pushpak hotute a kâwm a, ramri hrul leh a panna kawngpui siam ṭhat hna thawh dan a sawipui. Border Roads Organization (BRO) hotute chuan, an hnathawh tichak tura ngenna leh rawtna hrang hrang an thlen a; an sawi danin, Mizorama kawngpui siam tur pawimawh zingah cheng vbc. 600 senna tur Kawnpui - Durtlang - Aizawl inkar kawngpui km. 60-a thui leh cheng vbc. 935 senna tur Sairang - Tuipuibari kawng km. 93.4-a thui a tel.

CM Lal Thanhawla chuan, Mizorama kawngpui siam turte chu a rang lama thawh ṭan a nih theih nan a theih ang anga kawng zawnpui a tum thu a hrilh a ni.

l Gujarat khawpui Ahmedabad-a Science City-ah National Children's Science Congress vawi 25-na ṭan a ni a, Mizoram aṭangin Science Teachers Association Mizoram (STAM)-in a tirh zirlai pariat leh anmahni hruaitu zirtirtu pathum an tel. National Children's Science Congress hi kum tin December 27-31 chhung neih ṭhin a ni a, kum 2017-a thupui chu 'Science, Technology & Innovation for Sustainable Development' tih a ni.

l Zan dar 10:30 velah KṬP General Conference vawi 57-na neihna atana West Phaileng khelmuala sak mek pandal a chim a, thi leh hliam an awm lo. Thu dawn danin, pandal sak mek hi a chim lai hian a zauhna tel loin a chung chih zawh tawh, a bang la pin loh a ni. Pandal hi a chhunga mi 8,000 ṭhut lenna tura duan a ni a; a chim avang hian a tuk, December 28-ah khawtlang huap­in ṭhiah nghal a ni a, mi 1,125 an hnatlang a ni.

December 28
l Central KṬP bultumin Aizawlah ruihhlo leh mipat hmeichhiatna hman khawlohna laka fihlim tur leh HIV/AIDS darh zel tur veng tura inzirtirna atan Two Wheeler Rally buatsaih a ni.

Rally hi chawhma dar 11:30-ah Brigade Field, Bawngkawnah ṭan a ni a, mi 1,000 chuang telin, CKṬP leader Rev. Zothansanga'n a vai liam. Rally-a telte hi Bawngkawn aṭangin Ramhlun - Chanmari kawn - Sikulpuikawn tlanin, Upper Republic aṭangin ITI Veng kaltlangin Aizawl By-Pass Road-ah an tlan let a; Falkland Venga KṬP buatsaih mek Youth Recreation Centre-ah an lut khawm a ni. YRC hmunah hian CKṬP assistant leader Ngurhming­liana kaihhruaiin a khârna inkhawm neih a ni.

l Churachandpur, Manipur aṭangin All Manipur Working Journalist Union member-te'n Mizoram an rawn tlawh a, Governor Lt.Gen. Nirbhay Sharma chu Raj Bhavan-ah an kawm bakah, Aizawl khawpui chhung hmun hrang hrang an fang kual.

All Manipur Working Journalist Union member-te'n Governor an kawmnaah hian Mizoram Journalist Association president Vanlalrema Vantawl-in a hruai a; Larsap chu Mizoram an tlawh chhan leh an thil hmuh dante an hrilh. AMWJU member lo zinte hi mi pasarih niin, Zo hnahthlak vek an ni a; Mizoram sorkar hnathawhte zir chiang tur leh Zo hnahthlakte inunauna ṭha zawk siam tura MJA nena thawhho dan kawng ngaihtuah tura lo zin an ni.

l National Vector Borne Disease Control Programme (NVBDCP) hnuaia Mizorama sikserh natna dona atana hman tur Bolero car lei thar 10 chu Health minister Lal Thanzara'n MacDonald Hill-a Mizo High School Field aṭangin a thlah liam. Motor-te hi district khawpui leh khaw dang ṭhenkhata hman tur a ni.

Lal Thanzara chuan, kum 2030 hmain India ram aṭangin sikserh natna umbo tur­in sorkar laipuiin ṭan a la mek tih sawiin, Mizoramah pawh chak zawka bawhzui a nih theih nana motor lei thar chu ṭangkai taka hman a nih ngei a beisei thu a sawi.

December 29
l Champhai district MJA-in Champhai Vengthlanga Darthangvunga Traffic Point bula vantlang tana tui thianghlim a chhawp, 'MJA Siktuithiang' tih chu district bawrh­sap Vanlalngaihsaka'n a hawng. MJA Siktuithiang hi Champhai MJA-in an silver jubilee lawmna atana an siam a ni a, a siam nan Rs. 1,80,000 chuang an sêng. MJA Siktuithiang dahna, water cooler machine bunna atan hian BSNL, Postal department leh Power & Electricity department ten a hmun tur an ngaihtuahsak a, Champhai BDO-in Rs. 1,00,000 a pe bawk.

l Aizawl tlawha rawn zin All Manipur Working Journalists Union (AMWJU) member-te'n chief minister Lal Thanhawla a banglaah an kâwm a; Mizoram sorkar hnathawhte leh Zo hnahthlak inpumkhatna chungchang an sawipui.

Chief Minister chuan, khawvel hmun hrang hranga Zo hnahthlakte inpumkhata atan Duhlian ṭawng chu pawm tlân theih ni se ṭha a tih thu a sawi a; Mizo ṭawng (Duhlian ṭawng) chu Zo hnahthlak hnam pêng hrang hrangin an hriatthiam vek avangin hnam inpumkhatna siam tur leh inpumkhatna ṭawngah hman ni thei se ṭha a tih thu a sawi a ni.

December 30
l Traffic Management Coordination Committee ruahman angin chawhma dar 10 leh tlai dar 4 inkarah Aizawl khawpui laili, Zodin Square leh Chanmari kâwn inkarah lirthei kal phal lohna hmun, No Vehicle Zone siam leh a ni.

December 31, 2017
l Kum 2017-a ni hnuhnung ber a ni a, sorkarin hâlpuah leh hâlmawite khap mah se, zanlaiah kum 2017 thlahna leh kum 2018 lawmna atan Aizawl veng hrang hrangah hâlpuah hâl ri hriat tur a tam hle. District khawpui dangah pawh hâlpuah ri hriat tur a awm pheuh pheuha thu dawn a ni. Meithallawn (sky lantern) eng emaw zat hmuh tur a awm bawk.

Kum hlui thlah zanah hian dan leh thupek kenkawhna kawngah harsatna leh buaina lian tham a awm lo nia thu dawn a ni. Aizawl Civil Hospital-ah pawh emergency-a pantu an pun phah lutuk lo a, tlai lam aṭanga a tuk thlengin ACH Casualty pantu mi 160 an awm a ni.

l Zawlpala Thlantlanga Phulpui Branch YMA sak Zawlbûk chu zan dar 6:30 velah a kâng a, ṭhelh hman lohin a kâng ral. Thu dawn danin, Zawlbuk hi Phulpui YMA-in hmun dang aṭanga ṭanpuina tel loa an sak a ni a, a kan chhan hi hriat a ni lo. Phulpui Branch YMA chuan, Zawlpala Thlantlang chu hlutsaktu leh tlawhtu an pung zel tih sawiin, a tlawhtute chu tlangah bawlhlawh paih mai mai lo tur leh kângmei chhuak thei lakah fimkhur turin an ngen a ni.

January 1, 2018
l Kum 2018-a ni hmasa ber a ni a, Mizorama kohhran hrang hrangte'n hlim takin an lawm. Kum thar hi Mizoram hmun hrang hrangah kohhran eng emaw zatin ruai

ṭhehin an lawm a; ruai la ṭheh lo ṭhahnem tak an awm bawk a, kohhran tam tak chuan Pathianni anga serhin inkhawm an nei a ni.

January 2, 2018
l Mizoram hmun hrang hrangah kohhran tam takin 2018 kum thar lawmna ruai an ṭheh. Kum thar lawmna ruai ṭhehtute hi Presbyterian Kohhran leh Baptist Kohhrante an ni deuh ber a; January 1-a ruaiṭheh tawh, January 2-a nawn leh pawh an awm nual nia thu dawn a ni.