Phalna neite chauh luh phal

Home department chuan thuchhuah siamin, COVID-19 laka Mizoram a him theih nan Mizoram páwn hmun hrang hrang aṭanga Mizorama lut turte chu uluk taka endik an nih dawn thu an tarlang a, "Endik hnua phalna neite chauh check post/gate kaltlang phalsak an ni ang," an ti.

Home department tarlan danin, Zokhawthar, Kawrpuichhuah, Kânhmun leh Khawkâwn checkpost-te chu zing dar 9 aṭanga tlai dar 5 thleng hawn a ni dawn a; Bairabi leh Vairengte checkpost-te chu zing dar 6 aṭanga zan 10 thleng hawn a ni dawn thung. Check post-ahte hian bungrua leh khualzinte uluk taka endik tur a ni.

Endik hnua phalna lehkha pekte chu checkpost kaltlang phalsak an ni dawn a, phalna neite chu checkpost khâr hnuah pawh kaltlang phalsak an ni ang. International leh inter-state checkpost zawng zawngah district thuneitute chu daidanna (barricade) siam tura tih an ni a; India ram páwn aṭanga mi rawn lut tur dang turin checkpost tinah hian eng lai pawhin police an duty dawn a ni.