MZU Southern Campus sawiho

Nimin khan Higher & Technical Education (HTE) minister Dr R Lalthangliana hoin Mizoram sorkar hotute leh Mizoram University (MZU) hotute’n MZU Southern Campus din dan tur an sawiho.

HTE Minister chuan, MZU Southern Campus chu academic session tharah zirna kalpui turin bul ṭan ni se a duh thu a sawi a, “Hemi atana mamawh temporary campus atan Mizoram Engineering College, Pukpui hman theih a nih ka beisei. Ministry approval la tura pawimawh hmasa ber pahnih - ram pekna lehkha leh temporary campus hman tur a awm tih a rang thei ang bera tihfel a ni ang,” a ti.

Mizoram sorkarin a tih tur ang ang chu a ti nghal dawn tih sawiin R Lalthangliana chuan, “Temporary campus luah tura Mizoram sorkarin a tih la ngai campus panna kawng siam, tui leh electric pek leh staff transit accommodation sak chungchangah pawh, cheng vbc. 11 sénga tih tum mek a ni,” a ti a, chief minister Zoramthanga pawh a phûr thu a sawi.

MZU vice chancellor Prof. KRS Sambasiva Rao chuan hmathlir thui tak nei chunga bul ṭan a pawimawh tih a sawi a, “Hmunhma ṭha leh zau ṭha tak mamawh a ni dawn a, a rang thei ang bera ram pekna ‘land allotment’ lehkha tihfel leh campus din fel a nih hmaa course kalpuina tur chu Mizoram sorkar mawhphurhna a nih angin hmalak thuai ni se a duhawm hle,” a ti.

Meeting-ah hian Lunglei South bialtu MLA Dr K Pachhunga leh Lunglei North bialtu MLA Dr Vanlalṭanpuia te pawh an tel a ni.