Mizoramin hmabak êng tak a nei - Governor

Governor PS Shree­dharan Pillai chuan nimin khan lehlángin Champhai a tlawh a, Champhai Circuit House-ah official leh tlawmngai pawl hruaitute kâwmin, Mizo­ramin hmabak êng tak a neih thu a sawi.

Larsap chuan, Mizo­rama sorkar, tlawmngai pawl leh kohhrante inkarah thawhhona ṭha tak a awm tih sawiin, "Mizoram hian hmabak êng tak a nei. Zirna lamah, a bikin mathematics leh science-ah ṭan lâk thar a ngai. Mahni intodelh tuma chona hmachhawn ngam a ṭul," a ti.

Governor chuan, mi­pui thlan ram hruaitute leh sorkar hnathawkte chu mipui rawngbawl kawngah ṭhahnemngai taka thawk zel turin a chah a, "Mipui zingah hun tam thei ang ber hmanga an harsatna leh mamawhte hriatpui tum ang che u," a ti a; khua leh tuite'n an ni tin nuna an mamawh ang tura tuk chin tal an dawn chu zalenna tluantling a nih thu a sawi.

Inkhawmah hian Cham­phai DC SL Naveen chuan, an district leh department hrang hrangte hlawhtlinnate a sawi a; SP Rex Zarzoliana'n police dinhmun tlangpui leh an hlawhtlinnate a lem nen a sawifiah. Governor hian Mazuia Memorial Home (TNT) a tlawh a, thilpek a hlân a ni.