NLUP la dawng kim lo pek zel tum

NLUP Implementing Board (NIB) chairman JH Roṭhuama, MLA chuan, NLUP chu kum nga chhung atan tih ni mah se, kum nga chhungin tih zawh theih a nih loh avangin kalpui zel a ngaih thu a sawi.

Nimina NLUP conference hall-a NLUP Calendar tlangzarh paha thu a sawinaah JH Roṭhuama chuan, NLUP dawng tura thlan tawh leh dawng mek, an dawn tur ang la dawng zo lote hnenah pek zel a nih tur thu a sawi a, "A tirah chuan Prime Minister-in NLUP kan kalpui dan ṭha a ti hle a, state dangah pawh kalpui a tum thu a sawi. Mahse, political takin Congress party chakna a ni tiin PM-ah hêkna a lut a, chu'ng hêkna hrang hrang chu CM Pu Hawla'n a dawng vek a ni," a ti.

NIB Chairman chuan, NLUP atan cheng vbc. 3,000 deuhthaw Central-in budget piah lamah a rawn pe nia sawiin, "NLUP hi khawvelin

ṭha an ti a, chuvangin, a zuihral thiang lo. Tunah hian department hrang hrangin an sum hman bàn kan khawm mek a, a hlawhtlin zelna turin kan dah a ni," a ti a; NLUP khawihtu department-a thawktute chu kum tharah pawh ram tan rawng kan bawlnaah ṭhahnemngai taka thawk zel turin a sáwm.

JH Roṭhuama chuan, NIB aṭangin eirukna a awm thiang lo a, a awm thei lo bawk nia sawiin, "Board-in department-ah a pe chhuak ṭhin a, Chief Minister-in kalpui zel tura a duh angin kan kalpui zel dawn. Ṭhangthar lehkhathiamte tan sorkar hna a awm vek dawn loh avangin anmahni kea an din theih nan Line department-te'n theihtawp chhuaha hma an lak zel a pawimawh," a ti.

NLUP Calendar hi copy 50,000 siam niin, Rs. 50 man a ni a, NLUP hmalakna leh hlawhtlinna hrang hrangte tarlan a ni.