Zophaia mosque sak MZP-in an enfiah "Mosque an sak chhunzawm ngei"

Mizo Zirlai Pawl (MZP) chuan, Bairabi Zophaia Mosol­man-te'n mosque an sak, sorkar thupek vanga hun eng emaw chen an chawlhsan tawh chu tun hnaiah an sa chhunzawm nia an hriat avangin nimin khan a hmunah an enfiah. Mosque satute chu sa chhunzawm lo tura an hriattir bakah, slab chhùnna tur dona an siamte an ṭhiahsak tih an tarlang.

MZP thuchhuah chuan, Mizoram leh Assam lamin kut an thlak phal loh ve vena hmuna Assam lam mite'n mosque an sa chhunzawm chu an hrethiam lo hle tih sawiin, "A hmunah kalin enfiah a ni a, hma thar an la ngei a ni tih hriat a nih avangin slab chhûn tuma a dona tur an siam thar chu ṭhiahsak a ni. Sa chhunzawm tawh lo tura hrilh nghal an ni a, an tilui a nih chuan veng turin MZP chuan tih hreh a nei dawn lo. Kan ram humhim tur leh a ṭul anga che turin MZP chu a inrálring reng a ni," a ti.

Mizoram police-te an awm lai renga Assam lamin hma thar laa hna an thawk ṭhin chu mak an tih thu sawiin MZP chuan, "Mizoram police duty-te pawh hna chhunzawm tumna a awm a nih chuan lo dang ve tawh turin kan ngen nghal," an ti a; Mizoram sorkar thuneitute chu ram venhimna kawngah chak zawka hma la a, ramri veia ngaihven turin an phût. Bairabi Zophai tlawhnaah hian MZP Gen.Hqrs. hruaitute bakah, MZP Headquarters, Kolasib leh MZP Sub-Head­quarters, Bairabi hruaitute an tel a ni.