Mizoram Governor leh ICC hotuin Investment chungchang an sawi dûn

Indian Chamber of Commerce (ICC) aṭanga lo kal, West India Office enkawltu Sharmila Banerjee chuan nimin khan Raj Bhavan-ah Governor Lt.Gen. Nirbhay Sharma a kâwm a; ICC kaltlanga company liante'n Mizorama sumdawnna leh hmalakna (investment) an neih theih dan tur an sawi dun.

Governor chuan, ICC chu India rama sumdawnna tihhmasawn tumte pawl zinga upa ber a nih angin, India rama hmarchhak state-te tilâra tihmasawn theitu an ni tih a sawi a, "Sorkar laipui Act East Policy nen pawh a inrem hle. Mizoram leh hmarchhak ramte bakah, Myanmar leh Thailand thlenga insumdawn tawnna ruahman theih ni se a duhawm hle," a ti.

Sumdawnna lama hma latu investor-te chu Mizoramah kalin, eng lam hawi zawnga investment siam chi nge tih enfiah thei a duh thu sawiin Larsap chuan, "Ka tawnhriat aṭangin Mizoram hian hmar­chhak ramte zinga theihna nei ṭha ber a niin ka hria," a ti a; tourism, agriculture leh horticulture-ahte hmalak ni se, Mizo mipui tana eizawnna ngêlnghet siamtu a nih tur thu a sawi.

Sharmila Banerjee chuan, Maharashtra leh Mizoram sor­kar hotute nena an indawr dan sawiin, "Sorkar aiawh, investor leh kut hnathawktu pawl hotute tana inhmuhkhawmna Mumbai khawpuia buatsaih a ni ang," a ti.

ICC hnuaiah hmarchhak ramte tana investment zir chiang tur bik Core Group an din thu sawiin Sharmila Banerjee chuan, "January 11-a Mumbai khawpuia ICC Business Summit neih turah pawh programme mumal tak hmarchhak ramte tana duang sa hman ngei kan duh," a ti a; tourism chawikâng tura tour operator hrang hrangte nena an inbiak thu a sawi bawk.