MPYCC-in duhsakna an hlan

Mizoram Pradesh Youth Congress Committee (MPYCC) chuan thuchhuah siamin, Mi­zo­ram mipuite kum thar 2018 chibai an bûk a, mimal leh chhungkaw tinte tan kum ṭha leh hmasawnna kum a nih theih nan duhsakna an hlan.

MPYCC chuan, Krismas leh kum thar 2018 lawmna boruak muanawm tak hnuaia hman a ni chu lawmawm an tih thu sawiin, "Kum dang zawng aia buaina a tlem te, lirthei chetsualna tlahniam te, police station tin report aṭanga thunun ngai an tlem tate kha chanchin lawmawm tak a ni. Thuneitu te, a bikin Home department enkawltu minister R Lalzirliana leh Home department-a thawktute zawng zawng hmalakna leh thawhrimna vang a ni a, an inpekna hlu tak kha ropui kan ti hle a ni," an ti.

Congress ṭhalaite chuan, police-te thawhpuitu khua leh veng tina YMA, VDP leh pawl dangrte inpeknate chu lawmawm an tih thu an sawi bawk.