Phullenah rannung seh natna a lêng

Phullen khuaah December 2017 aṭang khan rannung seh natna, Scrub Typhus a léng a, January 3, Nilaini thleng khan mi 47-in an vei tih finfiah (confirm) tawh a nih bakah, mi pakhat a thi tawh. Natna leng enfiah tur leh a ṭul anga hna thawk turin nimin khan Aizawl aṭangin medical team-in Phullen an pan.

Phullen BDO Mal­sawmtluangi'n Vanglaini palai zawhna chhanga a sawi danin, Phullen khuaah hian nikum December thla tìr lam aṭangin rannung seh natna hi hriat ṭan a ni a, a veitu an pung zel a, Phullena doctor-te'n en enfiahnaah January 3 thleng khan mi 47-in an vei tawh tih finfiah a ni. A vei tawh confirm bakah hian, vei nia rinhlelh, la confirm lo an awm bawk.

Aizawl district-a Phullen khuaa Scrub Typhus veitute zingah tun dinhmun­ah chuan an nunna atana hlauhthawnawm lutuk an awm rih loa an ngaih thu sawiin Phullen BDO chuan, "Damdawi-inah enkawl an ni lo a, anmahni in lamah enkawl an ni," a ti.

Vanglaini palai zawhna chhanga Phullen damdawi-ina Medical Officer-in a sawi danin, Phullen khuaah hian rannung seh natna vangin December 29, 2017 khan mi pakhat a thi a ni.

Phullen khuaa Scrub Typhus lêng enfiah tur hian nimin khan Aizawl aṭangin Health department-in surveillance team a tír a, IDSP state nodal officer Dr Pachuau Lalmalsawma leh thawktu dang pathum an kal. Surveillance team hian nizan khan community hall-ah vantlang inkhawm an buatsaih nghal.

Health department surveillance team hian Scrub Typhus endikna hmanruate an ken bakah, a vei tawhte enkawlna tur damdawi chi hrang hrang an keng a; a ṭul angin an chàmchilh dawn nia thu dawn a ni.

Phullen PHC-a MO chuan, nizana vantlang inkhawm an neihah hian Scrub Typhus kai nia inringhlelte chu inendiktir tur leh doctor-te pan vat turin an chah a; natna lan chhuah dan leh a veite enkawl dante an zirtir tih a sawi a; Aizawl aṭanga surveillance team kalin an ken test kit an neih leh tawh avangin inringhlelte chu vawiin lamah enfiah nghal an nih tur thu a sawi bawk.