YMA Kumpuan Committee-in Ruihhlo ti an pungah an ngai

Central YMA hnuaia Kumpuan Committee chuan Krismas leh kum thar inkarah ruihhlo vaiin tlaivarin an duty a, ruihhlo eng emaw zat an man. Kumpuan Committee hruaitute chuan, ruihhlo a hluar thu leh a ti ṭhin an pun thu an sawi.

Krismas leh kum thar vuakveta CYMA Kumpuan Committee-in ruihhlo an mante chu - heroin hawng 9, can 195 leh chhinsen 12; alprozelam tlêp 66; ganja fûn 13 leh khuh damdawi 370 a ni a, hâlpuah tlêp 34 an man bawk. Ruihhlo kaihhnawihah mi 145 an man a, mi paruk chu police hnenah hlanin, home-ah mi 11 an dah a ni.

CYMA Kumpuan Committee secretary FK Lalrinpuia chuan, tunlai hian ruihhlo ti an pun thu sawiin, "Ruihhlo pun chhan nia kan hria chu - rim a neih loh vang leh ruih nuam an tih vang a ni," a ti.

FK Lalrinpuia sawi danin, ruihhlo ti ṭhinte hi kum 20-30 inkar an ni tlangpui a, ruihhlo ti an man zinga naupang ber chu kum 16 a ni. Ruihhlo an man zingah sorkar hnathawkte pawh an awm ṭhin a, zilhhau hnua sim theiha beiseite chu home-ah dah an ni.

Kumpuan Committee-te hi Krismas leh kum thar vuakvetah tlaivar ṭhakin an duty ṭhin a, CYMA president Vanlalruata leh vice president R Lal­ngheta, Kumpuan Chairman ten an uap reng a ni.