Thingtlangah zirtirtu quarters sa dawn
Mizoram sorkar chuan thingtlang khaw hrang hrangah zirtirtute tan quarters tur a sa dawn. Tun hnai khan School Education department chuan order tichhuakin, zirtirtu tan minister leh MLA-te hnenah transfer dil khap a nih thu a puang.
Vanglaini palai zawhna chhangin School Education minister Lalchhandama Ralte chuan, thingtlangah zirtirtute quarters tur sak a nih dawn thu a sawi a, "A bul ṭanna atan constituency pathumah quarters sak kan dil a, constituency pakhatah min phalsak rih. Pilot project atan zirtirtu quarters hi Tuikum bialah sak a ni dawn a, in 20 sak tur a ni. In pakhat hi chhungkaw pali zel luah theih tur a ni dawn," a ti.
School Education Minister chuan, tun hnai khan department-in order chhuahin, zirtirtute'n minister leh MLA-te hnena transfer an dil khap a nih thu a sawi a, "An dil lui a nih chuan action lak tur a ni. Transfer an dil duh a nih pawhin kalphung pangngaiin, an concern officer hnenah an dil tur a ni," a ti a, mi dangin minister leh MLA-te hnena zirtirtute transfer an dilsak erawh khap ngawt theih a nih loh thu a sawi.
Lalchhandama Ralte sawi danin, zirtirtute transfer dilna chu Education Minister hnenah chuan zirtirtu awm zat, zirlai awm zat leh zirtirtute an sikula an awm chin tawhte nen a thleng nghal vek tawh dawn a ni. Assembly budget session neih zawh taka an pawm, 'The Mizoram Education (Transfer and Posting of School Education Teachers) Amendment Rules, 2020' chu hman a nih ngei dawn thu sawiin Minister chuan, "Hman nghal but but chi a ni lo. Zirtirtu zawng zawng an awmna hmun ngaia an awm zat te, an sikula zirtirtu dinhmunte leh zirlaite dinhmunte kan zir chiang ang a, chumi mil chuan Rules hi kan hmang ang," a ti.
Lalchhandama Ralte chuan, sorkar sikul, a bik takin elementary-ah naupang an luh tam theihna atan zirtirtute chu an veng/khuaah theihtawp chhuah tura hriattir an nih thu sawiin, "Sorkar sikul - fee awm lo, lehkhabu a thlawna dawnna, chawchhun a thlawna dawnna hi zirlaite luhna tlakah kan siam chho zel a ni," a ti a; nu leh pate chu an fate sorkar sikula luhtir hreh lo turin a chah. Muster roll-a thawk mek zirtirtute chungchanga zawhna chhangin Lalchhandama Ralte chuan, "Thla thum chhung chauh thawhtir chi a ni lo. MR-ah chuan hun bituk chin a awm ṭhin. Remchang hmasaah an thawh zawm lehna tur order tihchhuah mai turah ka ngai a, kan chhawr chhunzawm leh ang," a ti.
School Education
Minister thusawi
• Thingtlangah zirtirtu quarters tur sak a ni dawn
• Zirtirtu-in minister leh MLA-te hnena transfer a dil khap a ni a, a dil chuan action lak a ni ang
• The Mizoram Education (Transfer and Posting of School Education Teachers) Amendment Rules, 2020 kan hmang dawn
• Sorkar sikul luhna tlakah kan siam chho zel
• Muster roll zirtirtute kan chhawr chhunzawm dawn