KHAWTHLIR

T Romana College NSS unit chuan nimin khan an college-ah blood donation camp an huaihawt a; Aizawl Civil Hospital tan thisen unit 133 an pe a, a petute mipa 101 leh hmeichhia 32 an ni.

UDPA department chuan March 11, Nilaini khan Serchhipa UDPA pisaah Serchhip district MJA member-te tan 'Waste management & environmental conservation' chungchang zirhona an buatsaih. He hunah hian MJA member eng emaw zat an kal a, UDPA officer Vanthangpuii Vanchhawng-in kaihruaiin, F Lalnunhlima, B.Sc. (Forest) leh Lawmzuali ten hriat tur pawimawhte an zirtir a ni.

Aizawl leh Lawngtlai DC-te chuan thupek chhuahin COVID-19 laka Mizoram a him theihna atan, an district chhunga ramdang leh state dangte nena inkalpawhnate khar a nih thu an tarlang. Aizawl DC chuan Mizoram-Tipaimukh (Manipur) road khar a nih thu tarlangin, Manipur pan turte chu Khawkawn, Saitual district-a hmun ruat bik a pan tur a nih thu a tarlang a, Lawng­tlai DC chuan Myanmar nena inkal pawhna - Zochachhuah, Laitlang, Archhuang, Saisih­chhuah leh Hruitezawla leh Bangladesh nena inkal pawhna Parva khuaa mite chu khar vek tur a nih thu a tarlang.

YMA Central Executive Committee (CEC) nimina ṭhukhawm chuan, Coronavirus (COVID-19) laka mipui an him tlan theih nan, YMA hminga intawh khawmna hrang hrangte hun eng emaw ti chhung atan tih rih loh an rél. Central YMA-in tih rih loh tura a tihte chu YMA sub-headquarters leh group conference/rorel inkhawm, kumpuan hawnna inkhawm leh sport-te a ni.

Nimin aṭang khan Ministry of Information & Broadcasting hnuai­a Films Division leh Mizoram University-a Department of Mass Communication-te chuan ni 10 awh tur 'Best of MIFF @Mizoram, Documentary Film Festival & Filmmaking Workshop' an buatsaih a, South Indian lemchan thiam Anumol-i'n a hmanpui. Workshop-ah hian film scripting, shooting, sound mixing leh editing-te zir a ni dawn.