Phullenah rannung seh natna vei Mi pariat hmuh chhuah belh a ni

Phullen khuaa rannung seh natna, scrub typhus lêng chu Health department-in an buaipui zel a; nimin khan mi pariatin an vei tih hmuhchhuah thar a ni a, heti hian Phullenah hian scrub typhus vei mi 69 hmuhchhuah tawh an ni.

Phullen PHC-a medical officer Dr Zoliankimi Ngente chuan Vanglaini palai zawhna chhangin, Aizawl aṭanga an dawn thar test kit hmangin nimin khan mi 72 endik an ni a, chu'ng zinga pariat chuan rannung seh natna an vei tih hmuhchhuah a nih thu a sawi.

Phullen damdawi-inah hian test kit an hman zawh tawh avangin kum thar tìr tê-ah rannung seh natna vei nia inringhlelte endik chhun­zawm theih a ni lo a; January 4, Ningani khan Aizawl aṭangin survei­llance team tirh chhoh an ni a, test kit an kente hmangin nimin khan inringhlelte chu endik nghal an ni.

IDSP state nodal officer Dr Pachuau Lalmalsawma hoa kal surveillance team hian Ningani zan khan vantlang inkhawm an ko a; mi ṭhahnem tak kal khawmin, scrub typhus darh theih dan, inven dan leh a veite enkawl dante an sawifiah.

Ningani zana vantlang in­khawmah hian Dr Zoliankimi Ngente-in scrub typhus natna awm­zia, a lan chhuah dan leh enkawl dan a sawi a; Dr Pachuau Lal­malsawma'n scrub typhus thlentu rannung awmzia leh an chen duhna hmunhma te, mihring taksaa pawi an khawih dante sawiin, Dr Lalrotluanga, entomologist-in scrub typhus nihphung leh natna laka inven dante a sawi thung. Surveillance team hian nimin chawhnu khan Phullen an chhuahsan leh nghal a ni.

Dr Zoliankimi Ngente chuan, rannung seh natna veite'n hma an sawn a, an ziaawm chho zel tih a sawi a, "Dam ṭha tak la ni hlawm lo mah se, an dam chho zel a, dam­dawi-ina admit ngai an awm lo a, an in lamah an inenkawl a ni," a ti.

Dr Zoliankimi chuan, rannung seh natna chu tuhrik chi khatin a seh vanga awm a nih thu a sawi rualin, chutiang tuhrikin a seh zawng zawngin an vei kher chuan loh thu a sawi a, "Natna hrik paitu tuhrikin an seh vang a ni a, tuhrik zawng zawngin natna hrik an pâi lo. Hetiang natna hi hrik paitu tuhrikin a seh aṭanga kai a ni a, mihring leh mihringah inkài chhàwn theih a ni lo," a ti bawk.

Phullen khuaah hian rannung seh natna hi November 2017-ah hmuh ṭan a ni a; November 2017 thla khan mi 17 endik zinga mi 14-in an vei tih hmuh niin, December 2017 chhungin mi 51 endik zinga mi 47-in an vei tih hmuh chhuah a ni. Nimina mi 72 endik zinga mi pariatin an vei tih hmuh chhuah leh a nih avangin, Phullen khuaah tun hnaia mi 140 endik zinga mi 69 chuan scrub typhus an vei hmuh chhuah a ni.

Phullenah hian rannung seh natna vang hian nikum December thla tâwp lam khan mi pakhat a thi tawh bawk.