IPR leh MJA-te an inkâwm khawm

Information and Public Relations (IPR) department leh Mizoram Journalists' Association (MJA)-te chuan nimin khan IPR Auditorium-ah kum thar 2018 atana Pathian hnena inhlan tharna leh thingpui inhona hun an hmang.

Inkhawm hi IPR director David L Thang­liana'n a kaihruai a, de­puty director C Lalnun­kima'n hunserh a hmang. Director chuan, Mizorama journalist-te leh IPR department-in thawhona ṭha tak an neih ṭhin chu chhawm nun zel a nih a beisei thu a sawi a; media platform hrang hrangah Mizoramin hma a sawn theih nan inkungkaihna ṭha nen thawhpuiah MJA member-te sáwmin, infinchhuah zel ṭha a tih thu a sawi a ni.

David L Thangliana chuan, sorkar lama aṭanga a remchan dan angin kum­inah pawh hmalakna tur duan a nih thu te, press mite tan sorkar hmalakna hrang hrang tlawhna hun (project site visit) tam zawk ruahman tum a nih thute a sawi bawk.

MJA president Vanlal­rema Vantawl chuan, IPR department chu MJA-te tan nu leh pa nih tling a nih thu sawiin, journalist-te leh IPR department chu hna an thawh danah awmze nei zawka hma laho zel tura a duh thu a sawi.

Inkhawmah hian chanchinbumite'n kum thara IPR department leh press mite hmalakna leh kalphung atana ṭha an tihte an sawi a ni.