Cheural-a damlote'n ṭhat lam an pan

Lawngtlai district-a Cheural khuaa Baptist Church of Mizoram (BCM) kohhran kum thar 2018 lawmna ruai chaw eitu zinga damlo mi 150 vel chuan ṭhat lam an pan a, hniam lam pan emaw, harsatna lian lutuk emaw tawk an awm zui tawh lo nia thu dawn a ni.

Sangau-a chan­chinbumi FC Vanlalzawna hnen aṭanga thu dawn danin, Cheural khuaa kum thar ruai siamna atana hman tui, chaw leh sate chu enfiah turin a sample lak a ni a, result erawh hriat a la ni lo. Ruai eitu damlo zinga pakhat chu a na bik deuha ngaih a nih avangin Siaha District Hospital panpui a ni a, mahse, ani pawh tunah chuan a ziaawm tawh.

Cheural khuaa ruai chaw eitu damlote hi Sangau damdawi-ina doctor leh thawktu dangte leh Bualpui NG damdawi-ina nurse pahnihte'n a hmunah kal chilha an enkawl bakah, Christian Hospital, Serkawn aṭangin medical team-in an kal chilh bawk a; BCM hmunpui Serkawn aṭangin BCM general secretary Rev.Dr F Ramdinmawia pawhin tlawhin, ṭanpuina Rs. 20,000 a pe a ni.