KHAWTHLIR

UIN neih tur
Mizoram sorkar chuan thuchhuah siamin, Ministry of Home Affairs aṭanga thupek dawn angin Aizawl district chhunga silai licence nei zawng zawngte'n an silai licence-ah Unique Identification Number (UIN) digit 18 an nei vek tur a nih thu a tarlang a, "Arms licence-a UIN la ziak lo leh nei lo zawng zawng chuan DC Office, Aizawl Arms Branch-ah March 31, 2018 ral hmain tihfel vek tur a ni. Hun bithliah chhunga tifel lote chu arms licence cancel vek tur a ni," a ti.

Hmalakna thlirlet
Minister PC Lalthanliana chuan nimin khan a pisaah a department chan, Social Welfare leh Horticulture department-a thawktute a kawm a; kum hlui lama an hmalaknate thlirletna hun a hmanpui bakah, kum thara hmalakna turte a sawipui.

Zirlai chawimawi
MSU Sub-Headquarters, Mualthuam 'N' chuan nimin khan an khaw community hall-ah zirlai tiṭhate chawimawina hun an buatsaih a, MSU president RB Lalmalsawma'n a hman pui. Zirlai chawimawite hi mi 12 an ni.

Zirlai camp
Student Outreach Programme pêng pakhat atan 46 Assam Rifles chuan January 4 aṭang khan Sainik School, Chhingchhipa zirlai lut duhte tan training camp an buatsaih a, January 6 thleng neih a ni ang. Zirlaite chu January 7, Pathiannia Sainik School entrance examination awm tura inbuatsaihna atana ṭangkai thei tur chi hrang hrang zirtir an ni.

Inhlan thar
School Education department directorate-a thawkte chuan nimin khan an conference hall-ah kum 2018 atana inhlan tharna hun an hmang. He hunah hian School Education director K Lalthawmmawia chuan, "Kan hna thawhna office hi kan in pahnihna a ni," tiin, thawktute chu rilru thar pú a, mahni insiamṭhatna leh hmasawnna tur ngaihtuaha kum 2018 hmang turin a sáwm a ni.