Ram danga hna thawh kawngah Fimkhur turin Police-in an ngen

Mizoram Police chuan, tun hnaiah Mizo ṭhalaite'n Myanmar kaltlangin Singapore, Malaysia, Macau, etc. ah inhlawh turin an kal ṭhin tih sawiin, Myanmar kaltlanga inhlawha kal chu thil îtawm leh ṭha tak angin lang mah se, a him lo hle niin an tarlang a; fimkhur turin mipui an chah.

Mizoram police thuchhuah

1. Agent-te hian an sâwm chhuah laiin kal man/riah man/chaw ei man a thlâwn vek turin an sawi ṭhin a, mahse, an sawi angin a thlawn a ni lo. An hnathawhna tur hmun ram dang an thlenin service charge atan an thla 6/7 hlawh an rulhtir leh ṭhin.

2. Myanmar an thlenin an hna zawn chhung training an nei a, hemi chhung hian document lem hmangin agent-te'n Myanmar passport an siamsak ṭhina hriat a ni. Hei hi Myanmar ram dan kalh a ni a, a hremna chu kum sarih tàn theihna a ni. Myanmar Police-te'n an man pawhin inbuaipui theih a ni lo.

3. Ram danga hna an thawh hian harsatna lo tâwkin, haw leh mai pawh duh se, agent-te'n an lo senso tawh kha an rulh lettír ṭhin a, inl ama chhungte tan phurrit tak leibá an insiam ṭhin a, rawn haw thla mai thei loin Myanmar-ah an tangkhang ṭhin a ni. Mizoram rawn let a harsa hle tawh ṭhin.

4. Myanmar khua leh tui anga an kal tawh avangin harsatna leh buaina an tawh palh pawhin khua leh tui anga inbuaipui a harsa ṭhin. Thihna hial an lo tâwk a nih pawhin, an ruang hi Mizorama lak luh theih a ni tawh lo.

5. Agent-te'n thawk tur anga an sawi apiang thawk lo thei lo dinhmuna an din avangin, an tum lâwk miah lohin mipat hmeichhiatnaah humsual an dai phah thei.

6. Dan ang thlapa in register placement agent an la awm lo a, agent-te hian thiam tak leh kal châkawm thei ang berin an sawi ṭhin.

7. Ram páwna hna thawka kal dawn pawhin Indian passport chauh hman tur a ni.