Larsapin official-te skill development leh Mizorama kawngpui dinhmunte a sawipui

Governor Lt.Gen. Nirbhay Sharma chuan nimin khan Raj Bhavan-ah chhâwng hnihin sorkar offcial-te a kâwm a; skill development leh Mizoram kawngpui dinhmunte a sawipui.

A chhawng khatnaah Governor chuan Labour, Employment & Industrial Training, Higher & Technical Education leh Mizoram Youth Commission hotute a kâwm a; Mizo ṭhalai lehkhathiam tam takte'n hna an hmu lo chu pawi a tih thu a sawi.

Sorkar hnain eizawnna a daih sêng lo tih sawiin Larsap chuan, "Mahni kutkea ding thei tura kan inpuahchah a pawimawh. Skill development lama nasa lehzuala ṭan lak a pawimawh a ni," a ti a; khawtlangah chi leh chi inthliarna nei lo mah ila, ṭhalaite'n hna thawh duh bik neih tlat chuan hriat loh hlanin inthliarna a awm theih thu a sawi.

Governor chuan, Mizoramah eng hna nge thawh tur awm tih zir chian hmasak a, mamawh dan azirin vocational training pawh buatsaih ṭha a tih thu a sawi bawk.

Meeting-ah hian National Skill Development Policy zulzuia Skill Development Policy Mizoram tan draft tawh a nih thu tarlan a ni.

A chhawng hnihnaah Governor hian PWD, Project Pushpak leh National Highways and Infrastructure Development Corporation Limited (NHIDCL) hotute a kâwm a; Mizorama kawngpui dinhmun a sawipui.

Meeting-ah hian, sorkar laipui aṭangin kawngpui siamna tur sum hmuh a tlem ṭhin avangin, duh anga kawngpui enkawl theih a nih loh thu tarlan a ni. Km. 87.18-a thui, Kaladan Multi Modal Transit Transport Project pawh 70% thawh zawh a nih thu tarlan a ni bawk.