Supply Minister-in LPG Bottling Plant tlawh

Food, Civil Supplies & Consumer Affairs (FCSCA) minister K Lalrinliana chuan March 11, Nilaini khan Mualkhanga LPG Bottling Plant a tlawh a; Petroleum and Explosives Safety Orga­nisation (PESO) endikna hnuhnung berin a phût ang thil ṭul ṭhenkhat siam belh a ngaih vanga hna chawlh lailawk mek chhunzawm thuai theih dan tur an sawiho.

Minister-in bottling plant a tlawhnaah hian FCSCA secretary HL Rochungnunga leh department officer te, Kolasib DC pisaa hotute leh Mualkhang leh Khàmráng khawtlang hruaitute an tel a ni. LPG Bottling Plant manager Z Lhungdim-a sawi danin, Mualkhang Bottling Plant chu Oil Industry Safety Directorate Standard 169 zâwm tura duan a ni a, chumi tur chuan kum 5 dan zelah endik a ni ṭhin.

Endik hnuhnung ber­ah khan Standard 169-in a phût ṭhenkhat - kâng ṭhelhna (automated fire hydrant) mumal tak siam te, Plant huam chhung felfai taka hung te, khawl lian bunna hrang hrangah lirthei luhchhuahna ṭha tak hmun hnih zela siam­te leh, gas dahkhawlna bûr lian (bullet tank) chuan hmun ṭhenkhatah a chhah dan tur ang a phak tawh lo. Chuvang chuan, January 16, 2020 aṭangin Mualkhang Bottling Plant-ah hna chawlh lailâwk a ni.

Mualkhang leh Khamrang khawtlang hruaitute chuan, Mualkhang LPG Bottling Plant chu an khaw mipui tan eizawnna ṭangkai tak a nih thu Mi­nister an hrilh a; a ṭul anga hna chhunzawm leh thuai a nih theih nan hma la turin an ngen. Minister K Lalrinliana hian Nilaini vêk khan Kolasib Circuit House-ah Kolasib district-a sorkar department officer ṭhenkhat a kâwm a, COVID-19 laka invenna kawnga district thuneitute hmalak dan sawiho a ni.