MSSSB Chairman pisa kai lo turin MSU-in an ngen nawn

Mizoram Subordinate Service Selection Board (MSSSB) chairman Lalrammawia, MSS (Rtd.)-in March 11, 2020-ah a hna thawh zawma pisa a kai ṭan hnuah, Mizo Students’ U­nion (MSU) Gen.Hqrs. chuan nimin khan pisa kai chhunzawm lo tura ngenna an pe.

MSU chuan, Lalrammawia chu rorel lai MNF party-ah nihna nei a ni tih sawiin, "MSSSB chairman atana political party-a nihna nei mek ruat chungchanga hmalakna kal zelah vawiin (March 12, 2020) hian MSU hruaitute chuan MSSSB Chairman-in pisa a zawm chu ṭha a tih loh avangin, pisa kal chhunzawm tawh lo tura ngenna kan pe a ni," an ti.

MSU chuan, an ngen nawnna chu zahsak ngei tur leh Mizoram sorkar pawh hma la nghal turin an ngen nawn leh a; an ngennate'n awmzia a nei lo a nih chuan a ṭul angin hma an lak zel tur thu an tarlang.