Mamit YMA-in Bru-te an lawmpui

YMA Sub-Head-quarters, Mamit chuan thuchhuah siamin, Tripura-a inbéngbel tur Bru-te chu an lawmpui a, duhsakna an hlân tih an tarlang.

Mamit Sub-Headquarters YMA chuan, Tripura camp-a awm Bru-te Mizorama hruai kîr hna vawi kua thawh a nih hnuah pawh Mizorama kîr duh lote Tripura-a an inbenbel theihna tura Ministry of Home Affairs, Mizoram sorkar, Tripura sorkar leh Bru pawlte’n inremna thuthlung an ziak chu lawmawm an tih thu an sawi a, “Tuikuk pawl hrang hrangte leh Tuikuk mipuite pawh an duhna hmun ngeia an awm theih tâk avangin kan lawmpui tak zet a, Tripura-ah khua leh tui ṭha ni turin duhsakna kan hlan a ni,” an ti.

Mamit YMA chuan, Mamit YMA Coordination Committee-te’n Tripura-a awm hlen tur Bru-te chu a rang thei ang bera Mizoram Electoral Roll aṭanga paih turin thuneitute an ngen tih an sawi. Bru lâk lêt hna thawh a nih ṭuma Mizorama rawn lêt, sorkar ṭanpuina dawng, Mizoram mi leh sa dik takte chauh Mizoram Electoral Roll-ah an awm zui zel theih nan fimkhur taka hma la turin thuneitute an ngen tih an sawi bawk.