SEDP-ah line department a awm nge awm lo?

Assembly budget session neih zawh takah khan Planning & Programme Implementation changtu chief minister Zoramthanga'n ZPM member C Lalsawi­vunga zawhna a chhannaah, SEDP kalpui turin line department a hranpaa thlan a nih loh thu a tarlan laiin, ZPM member dang Andrew H Thangliana zawhna a chhannaah chuan SEDP hnuaia project-te chu line department-te'n an thawh thu a tarlang thung.

SEDP chungchangah hian Planning changtu Chief Minister-in MLA pahnihte zawhna a chhannaah hian, pakhatah SEDP-ah line department bik an awm loh thu tarlan a ni a, chhanna dangah erawh chuan SEDP line department an awm thu a lang thung a ni.

C Lalsawivunga a chhannaa Chief Minister-in a tarlan danin, SEDP hnuaiah line department an awm loh rualin, sorkar department zawng zawngte chu SEDP tihlawhtling tura hma la tura tih an ni a; SEDP tihhlawhtlinna atan Mizoram sorkarin sum a hmuh theih zawng zawng - CSS, NEC, NESIDS, NABARD, EAP, central tax devolution to states, revenue deficit grant, states own revenue, leh a dangte hman tum a ni.

SEDP-ah village council/local council-te hnena thuneihna (power) pek belh tum dan Andrew H Thangliana'n a zawhnaah erawh chuan Chief Minister chuan, "SEDP hnuaia project thawh tur thlante hi line department hrang hrangte'n a ṭul ang zelin an thawk a. An thawh dan leh VC/LC an thawhpui dan chu line department-te ṭheuh kutah a awm a ni. Line department-te hian VC/LC leh mipuite ṭangkai thei ang bera an thawhpui beisei a ni," a ti.

Ram chhung leh khaw chhunga NGO-te leh entrepreneur-te hnenah khaw chhunga hmasawnna hna thawh chungchangah thuneihna leh mawhphurhna VC/LC-te pek an nih leh nih loh zawhna chu Chief Mi­nister chuan, "SEDP

hnuaia project thawh tur thlante hi line department hrang hrangte'n a ṭul ang zelin an thawk a. An thawh dan leh ram chhung / khaw chhung NGO-te leh entrepreneur-te an thawhpui dan chu line department-te ṭheuh kutah a awm a ni. Line department-te hian ṭangkai thei ang bera an thawhpui beisei a ni," tiin a chháng a ni.