Hripuiin zirlai 3,00,000 vel a nghawng : Zirlai tel loa zirtirtu sikul kaltir rawt a ni

Covid-19 léng vanga sikul hawn theih loh chhunga zirna kalpui dan tur rawtna leh kaihhruaina siam tura din Committee chuan inkaihhruaina (SOP) thar ber mila zirlaite tel loa zirtirtute sikul kaltir an rawt a; hripui lêngin Mizoramah zirlai 3,00,000 vel a nghawngah an ngai.

Human Resource Development Board vice chairman L Thangmawia, MLA kaihhruai Committee hian sorkar laipuia Ministry of Education-in inkaihhruaina a siam (PRAGYATA) behchhanin zirna kalpui dan turah Mizoram milin rawtna an siam a; an rawtnate chu nimin khan School Education minister Lalchhandama Ralte hnenah an thehlut a ni.

Committee chuan, SOP thar ber milin zirlaite tel loa zirtirtute sikul kaltir an rawt a, a kalphung chipchiar chu School Education department-in a duan turin an ti a ni. Hripui lèn chhunga zirna kalpuina atan sikul hrang hrangin sum an mamawh belh phuhrûkna turin special provision siam rawt a ni bawk. Rawtnate leh inkaihhruaina an duante chu sorkarin a pawm chuan hman nghal tur a ni ang.

Inkaihhruaina chi hrang hrang - online, partially online leh offline-a zirna kalpui dan tur te, zirtirtu, nu leh pa, zirlai leh sorkar mawhphurhna hrang hrangte tarlan a ni bawk.

Rawtna leh kaihhruaina siamna turin DEO leh SDEO office behchhanin survey neih a ni a, hripui léngin zirlai 3,00,000 vel a nghawnga chhût a ni.

Committee-ah hian School Education department officer, zirtirtu aiawhte leh ICT department-a mite an tel a, hripui lên chhunga zirna kalpui dan turah inkaihhruaina 'Guidelines for Education during prevalence of Covid-19 Pandemic' an siam a ni. Inkaihhruaina kalpui tur hian department awm sa bakah, state level committee leh local committee siam tura rawt a ni.

Minister Lalchhandama Ralte chuan, Covid-19 avang­in hun rei tak zirna pang­ngai kalpui theih a ni lo tih sawiin, "Online class kan neih theih dan a inchen lo em em a, khairual taka zirna kalpui dan tur kaihhruaina leh rawtna siamtu Committee-in a hun takah an rawn thehlut a ni," a ti a; rawtnate chu a rang thei ang bera hman a nih theih nan en zui a nih tur thu a sawi.

Thingtlang kilkhâwr tak takah internet nei ṭha lo an awm nual tih sawiin Minister chuan, "50% vel zetin online class an chhim thei lo tih hriat a ni a, online class nei theite nen khairual nan thingtlang hmun ṭhenkhat, VTF-te'n an phalnaah chuan regular-a class kal tawh mai a ṭha em tihte ngaihtuah a ngaiin ka hria," a ti.