MZU leh college-te'n zirlai a tam thei ang Admit tumin hma an la - HTE Minister
Higher & Technical Education (HTE) minister Dr R Lalthangliana chuan, Mizoram University (MZU) leh college-te'n zirlai a tam thei ang ber admit tumin hma an lâk thu a sawi.
Vanglaini palai zawhna chhángin HTE Minister chuan, college-te'n zirlai engzat chiah nge an admit theih dawn a la hriat loh thu a sawi a, "Aizawl lam hi chuan zirlai an admit theih zat tur an tifel thawkhat tawh a, thingtlang lamin an la tifel chiah lo. College-a zirlai admit theih zat tur tak hi hriat theih a la ni rih lo," a ti.
Dr R Lalthangliana chuan, a ngenna ngai pawimawhin MZU leh college-te'n zirlai a tam thei ang ber admit thei turin ṭan an la tih sawiin, "A lawmawm kan ti tak zet a ni. Zirlaite hmakhua ngaiin an ṭang hle," a ti a, MZU leh college-te chungah a lawm thu a sawi.
HTE Minister chuan, thingtlang college-ah lut hreh lo turin zirlaite a chah a, "Khawi college-ah pawh zirtirtu tling vek an awm a, mithiam tak tak vek an ni. College zirtirtute hi MPSC-in a lâk vek an ni a, an rintlak vek. Chuvangin, khawpui pawna college te hi an chhiat zawkna a awm lo a, zirlaite tan luh hrehna tur chhan a awm lo," a ti.
Vanglaini thu dawn danin, Covid-19 avanga phai lama college kal tum kum dang aiin an tlem a, chuvang chuan Mizorama college leh MZU-a luh tum ṭum dang aiin an tam leh zual a ni.
HTE Minister hian June 22, 2021 khan MZU Vice Chancellor leh Mizorama college hrang hrang principal-te lehkha a thawn a; kum 2021-22 academic session atan seat siam belh turin a ngen.
Dr R Lalthangliana chuan a lehkhaah, hripui lêng avangin harsatna a thlen thu tarlangin, "Zirlaite'n an tuar nasa. Zirtirna kalphungte pawh thlak danglam a ngaih tâk hial avangin zirlaite leh zirtirtute tan pawh thil buaithlak tak a ni," a ti a; kum kal taah pawh hripui vanga zirlai Mizorama hawte tan seat siam belh tura a ngenna an tihhlawhtlin avangin a lawm thu a tarlang.
HTE Minister lehkhathawn hi June 22 vêk khan MZU vice chancellor Prof. KRS Sambasiva Rao chuan a chháng nghal a, theihtawp chhuaha hma an lâk nghal tur thu a hrilh a ni.