National Green Tribunal thupek MPCB-in Mizoram sorkarah an thlen
Mizoram Pollution Control Board (MPCB) chuan, India rama state PCB-te tihlenna tura National Green Tribunal (NGT) thupek angin, Mizoram sorkar hnenah thawktu hrang hrang lâk leh MPCB thuam chak tura a tihna leh thupek dangte an thlen.
Vanglaini palaiin a kawmnaah MPCB hotute chuan, February 5, 2021- a NGT thupek angin, state sorkarah NGT thupek chhuah aṭanga thla ruk chhung ngeia MPCB tihlen leh thuam chakna tur action plan siam a ṭul thu Mizoram sorkarah an thlen tih an sawi a, "NGT thuchhuak ang chuan, state PCB tihlen leh thuam chak hi eng mahin an dâl tur a ni lo, a dâl theih dan leh thupek dangte chu NGT Act, 2010-in a paihthla vek tih state sorkar hnenah hrilh a ni," an ti.
Action plan-ah chuan, post ruak hnawhkhah te, pollution vènna atana hmanraw mamawh lei leh laboratory tihchangtlun te, hun pum (full time)-a thawk tur chairman leh member secretary ruat te, regional officer, engineer leh scientist lakte a tel tur a ni, a ti.
MPCB hotute chuan, lockdown chhungin NGT aṭanga an thu dawnte an bawhzui zel tih an sawi a; chu'ng zingah chuan, Covid-19 kaihhnawih bawlhhlawh sâwngbàwl te, mipui bawlhhlawh chungchang te, boruak thianghlim neihna tur te, thil siam chhuahna leh thing phun uar chungchangte a ni deuh ber tih an sawi.
NGT thuchhuak anga hmalaknaah hian, Covid-19 kaihhnawih bawlhhlawh sâwngbâwl chungchangah sorkar laipuiah Mizoram sorkar aiawhin MPCB-in report an thehlut a, application an siamah hripui veite enkawlna hmuna ni tina bawlhhlawh zat an pawmpui ṭhin. Solid waste sâwngbâwl chungchangah, Mizoram sorkar aiawhin MPCB hian report an thehlut bawk.
MPCB hotute chuan, NGT thupek angin plastic bawlhhlawh sâwngbâwl leh thehthang chungchangah, state sorkarte chu thla thum danah (quarterly) an hmalakna thehlut tura ngen leh hriattir an nih avangin CPCB-ah report an thehluh ṭhin thu an sawi a ni.
January 29, 2021-a NGT thupek angin, state sorkarah state leh district huap environment plan siam tur leh bawhzui tura ngenna thlen a nih thu te, Central PCB-ah a rang thei ang bera thehlut tura hriattir an nih thute an sawi.
February 1, 2021-a NGT thupek angin, Commerce & Industries department hnenah industrial zone/economic zone zawng zawngah local crisis group din tur a nih bakah, state crisis group leh district crisis group din tur a nih thu an sawi a; chemical hlauhawm sâwngbàwlna industry bulah a bika damdawi-in siam tura hma la tura ngen a nih thu an sawi bawk.
December 3, 2020-a NGT thupek angin, Mizoram PWD chu environment chhe zel tur vèn nan highway sír tawn tawnah thing phun tur te, highway tichhe thei thil chi hrang hrang titlem tur te, uluk taka highway enkawl leh venhim hna thawk tur leh an hmalakna thehlut tura hriattir an ni.
February 26, 2021-a NGT thupek angin, state sorkarte chu leilung hausakna - lung, lei, balu, adt. latute'n dan loa environment an tihchhiat avanga zangnadawmna chhût dan leh phût dan, CPCB duan sa hmang (adopt) tura tih an ni a; district tina hman tur duang tur leh thupeka mawhphurhna hrang hrang tihlawhtling tura tih a ni bawk.