KHAWTHLIR

Ráltlânte tanpui
Central YMA chuan nimin khan Myanmar aṭanga Zo hnahthlak Mizorama rawn ráltlânte ei tur buhfai leina atan Tuipuiral Group YMA hnenah Rs. 25,000 leh Tuiphai Group YMA hnenah Rs. 25,000 a hlan. Ṭanpuina sum hi YMA Sub-Hqrs., Champhai kaltlangin an pe a ni.

RAT tihna thar
Ramhlun North-a Nazareth Hospital leh Champhaia DM Hospital-te chu Rapid Antigen Test hmanga swab sample endikna hmun atan phalna pek thar a nih thu, sorkar thuchhuahin a tarlang.

Pass-te lawmpui
Minister of state TJ Lalnuntluanga chuan nimin khan a bial, Champhai South huam chhunga khaw pasariha kumin HSLC leh HSSLC-a pass thar mi 204-te hnenah khawtlang hruaitute kaltlangin lawmpuina dictionary a hlàn. A biala village task force-te hnenah Covid-19 laka invènna hmanraw chi hrang hrang a pe bawk.

CM Relief Fund
Nimin khan Leitan South Presbyterian Kohhranin Rs. 1,00,000 leh Durtlang Branch MHIP-in Rs. 10,000 Chief Minister's Relief Fund for Covid-19 ah an chhûng lut. CMRF for Covid-ah hian Rs. 27,00,79,678 a lut tawh a, Rs. 25,24,94,470 hman tawh niin, hman loh Rs. 1,75,85,208 a la awm.

Ei tur sem
Lunglei DC Kulothungan A hmalaknaa Akshaya Patra Foundation-in an rawn pek ei tur chi hrang hrang chu nimin khan Lungleia mi harsate leh containment zone huam chhunga awmte hnenah sem a ni.Akshaya Patra Foundation hian Lunglei DC ngen angin Lunglei district-a chhungkaw 700 tan ei tur chi hrang hrang, cheng nuai 10 man an pe a; district chhung khaw hrang hrangah sem tur niin, Lunglei khawpuia chengte tan bik nimin khan sem a ni.

SRH-ah 198 awm
SRH-ZMC-ah nimin tlai dar 5 thleng khan Covid-19 vei 198 enkawl mek an ni a, ICU-ah mi 38 leh ward-ah mi 160 an awm. ICU-a enkawl zinga mi 10 chu ventilator hmantir mek an ni a, ward-a awm zinga mi 50 chu oxygen pek mek an ni bawk.