Covid-19 vangin mi pathum thih belh
Nimin khan Mizoramah Covid-19 vanga thi mi pathum an awm leh a; sorkar chhinchhiah angin, nimin tlai dar 5 thleng khan hripui vangin Mizoramah mi 98 an thi tawh.
Shanda Prova Chakma (57), Kamalanagar-III (Chawngte-C), Lawngtlai district chu nimin zing dar 1:30 khan a thi a, Mizorama hripui vanga thi 96-na a ni.
Sorkar thuchhuak tarlan danin, SP Chakma hi Covid-19 positive a ni tih June 29, 2021 khan hmuh chhuah niin, Chawngte-ah enkawl a ni a, a dinhmun a ṭhat loh avangin Pathianni zan khan SRH-ZMC panpui ni mah se, kawng lakah, Lungrang South dáiah a thi a ni.
Hripui vei SRH-ZMC-a enkawl lai TC Lalzamlova (66) h/o K Lalhmachhuani, Electric Veng, Aizawl chu nimin zing dar 8:25 khan a thi a, nimin tlai dar 4 khan Electric Veng YMA Hall-ah vui a ni. Amah hi Covid-19 positive a ni tih June 16, 2021 khan hmuh chhuah a ni a, June 21 khan SRH-ZMC-ah enkawl ṭan a ni. Chuap ṭha lo nei sa a nih thu Electric Veng LTF hruaitute chuan an sawi.
Ngurliantluangi Sailo (74) w/o Aisanga (L), Armed Veng South pawh nimin chawhnu dar 1 khan hripui vangin SRH-ZMC-ah a thi a, Mizorama hripui vanga thi 98-na a ni. Amah hi Covid-19 positive a ni tih June 13, 2021 khan hmuh chhuah niin, ZMC-ah enkawl nghal a ni a; nimin tlai dar 5 khan Armed Veng South thlanmualah vui a ni.
Sorkar chhinchhiah danin, nimin tlai dar 5 thleng khan Mizoramah Covid-19 vanga thi mi 98 an awm tawh a; kum 2020 chhungin mi pariat, kumin January, February leh March-ah pakhat ṭheuh, April-ah mi pali, May-ah mi 25, June-ah mi 53 leh July thlaah mi paruk an thi tawh a ni.
