Sikulah Hmar ṭawng hman a ni dawn

Mizorama sikulah pawl 1-5 zirlaibua Hmar ṭawng hman tur chungchangah nimin khan SCERT seminar hall-ah ni nga awh tur zirhona, 'The First Phase of Workshop for Translation of Mizo Medium Textbooks of class I-V in Hmar Language' buatsaih ṭan a ni.

Kum 1994-a Mizoram sorkar leh Hmar People’s Convention (HPC) inremna thuthlung (peace accord)-ah Hmar ṭawng chu Mizorama primary school-ah medium of instruction atana telh a tel a; chumi tihpuitlin nan chuan nimin khan workshop buatsaih a ni. SCERT official-te leh Sinlung Hills Council (SHC) rawt anga textbook translation ti tura sorkarin a ruatte an tel a, SCERT director Laldawngliani Chawngthu-in a kaihruai.

SCERT Director chuan, pawl 1-5 inkarah Hmar medium of instruction chu hman tur a nih thu sawiin, "Academic session thar 2022-23 aṭanga hman tur a ni a, a tirah pawl 1-ah hman phawt a ni ang. A tahtawla hman chhoh zel tur a ni," a ti.

Laldawngliani Chawngthu chuan, zirlaibu siam leh lehlin chungchangah SCERT a fimkhur hle tih sawiin, Hmar ṭawnga zirlaibu letlingtu tura ruatte chu fimkhur taka ti turin a chah.

Pawl 1-5 zirlai Mizo medium zirlaibute Hmar ṭawnga letlingtu atan hian mi panga ruat an ni a; chungte chu - Lalthangkunga Hmar, Lalvarlien Puruolte, Sangaia, Joseph H Neingaite leh Henry L Khojol te an ni.

Mizoram sorkar leh HPC peace accord-a clause 5.1-ah, primary school-ah Hmar ṭawng chu medium of instruction-ah hman tur leh Mizoram major language-a recognise turin sorkarin hma a la ang, tih a awm a; mahse, Mizoram sorkarin a tihpuitlin mai loh avangin Sinlung Hills Accord Implementation Demand Committee chuan May 25, 2016 khan Gauhati High Court, Aizawl Bench-ah Mizoram sorkar an khing a ni.

High Court chuan September 4, 2017 khan judgement order tichhuakin, Mizoram sorkar chu kum khat chhunga Peace Accord 1994 clause 5.1 leh 5.3 tipuitling turin a ti a; mahse, sorkarin a la tihhlawhtlin mai loh avangin May 8, 2019 khan Gauhati High Court chuan Contempt of Court notice a pe leh bawk.

High Court-in contempt notice a pek hnuah Mizoram sorkarin hma a la ṭan a, Sinlung Hills Council nen ṭum eng maw zat an sawiho hnuah Hmar medium of instruction chu SHC huam chhung khaw 31-a primary school-ah kum 2022-23 academic session-a hman ṭan turin an ti ta a ni.