Kum dang aiin kum 2017 hunpuiah Kawlphetha hman zat a tlem zawk
Krismas leh kum thar vuakvêt chhung khan Mizoramin kawlphetha a hman tam lai berin megawatt 92.7 a hmang a, hei hi kum hmasa lama Krismas leh kum thar vuakveta kawlphetha hman zat aiin a tlem zawk.
State Load Despatch Centre (SLDC) aṭanga thu dawn danin, kum 2017 Krismas leh 2018 kum thar vuakveta Mizoramin kawlphetha a hman zinga megawatt 87.2 chu Mizoram páwn aṭanga hmuh a ni a, megawatt 5.5 chu Mizoram chhung aṭanga siam chhuah a ni.
SLDC hotute chuan, Krismas leh kum thar lawm zawh tâka Mizoramin kawlphetha a hman zat chu kum hmasa lam aiin eng emaw zatin a tlem zawk tih an sawi a; hman tlem zawk chhan ni thei zingah, kum dang aiin 2017 Krismas dawnah khawlai chei a tlem zawk vang leh chuta tana kawlphetha hman a tlem tak vang a nih thu sawiin, "Kum dangah chuan Krismas leh kum thar vuakveta kawlphetha hman tam ber laiin megawatt 100 chuang a kai ṭhin," an ti.
Hetih lai hian, prime minister Narendra Modi-a’n December 16, 2017-a a hawn tâk, Tuirial Hydro Electric Power Project aṭanga kawlphetha siam chhuahte chu Mizoramin a hmang mek zel.
Tuirial HEP hi kawlphetha megawatt 60 pe chhuak thei tura duan a ni a, tun dinhmunah kawlphetha siam chhuahna khawl pakhat chauh hman a la nih avangin megawatt 30 aia tam siam chhuah theih a la ni lo.