Dan lam zawhfiah theihna hmun Legal aid clinic 97 din a ni tawh

Mizoram State Legal Services Authority (MSLSA) chuan mipuiin dan lama an hriat duhte an zawhfiahna tur leh harsatna an neihte an thlenna tur hmun Mizoram pumah legal aid clinic 97 an din tawh a, chu'ng legal aid clinic-ahte chuan thawktu, para legal volunteer (PLV) 190 an awm mek.

MSLSA hotute chuan, legal aid clinic hi college zawng zawngah din vek tura ruahman ni mah se, college ṭhenkhat chuan an duh lo niin an sawi. MSLSA chuan a din theihna apiangah an din ṭhin a ni.

Tun dinhmunah Mizoram pumah legal aid clinic 97 din a ni tawh a, Champhai district-ah din tam ber tawhin, 22 din tawh a ni a, a tlemna ber Siaha district-ah pathum chiah din a la ni thung.

Legal aid clinic-te hi para legal volunteer (PLV)-te'n an enkawl a, tun dinhmunah PLV 190 an awm mek. Legal aid clinic hi dan leh thubuai chungchanga harsatna neite'n an pan chuan PLV-te'n an theih ang angin an lo pui ṭhin. PLV-te hi legal aid clinic awmna khua/venga mite an ni tlangpui.

PLV-te hi legal aid clinic-ah ni khatah darkar khat vel an awm tlangpui a; clinic-a an awm loh lai pawha biakpawh theih niin, chumi atan chuan clinic signboard-ah an telephone number tarlan a ni. Legal aid clinic-te hi MSLSA-in a rawih ukilin an

ṭhutchilh ve ṭhin bawk a; mahse, an tam lo a, Aizawlah pali leh Siahaah pathum chiah an awm a ni.

PLV-te chu MSLSA-in lawmman (hlawh) an pe a, ni khatah Rs. 250 pek tura ruahman ni mah se, thla khatah hrût rualin lawmman an pe mai ṭhin niin an sawi.

MSLSA hotute chuan, ukil rawihna tur nei lote ukil an rawihsak ṭhin tih sawiin, chutianga ukil an rawihte chu legal aid counsel tih a nih thu an sawi. Tun dinhmunah legal aid counsel 50 chuang an awm.

MSLSA hotute chuan, legal aid clinic chu Mizorama college zawng zawngah din tura ruahman ni mah se, college pangah chiah an la din thei tih an sawi a, "College dangah chuan din an phal rih lo a, a hmun tur an neih remchan loh vangte pawh a ni mai thei," an ti. College bakah, damdawi-in zawng zawngah pawh din theih an duh thu an sawi bawk.

Legal aid clinic din tawhna college-te chu - Pachhunga University College, Hrangbana College, Mizoram Hindi Training College, Mizoram Law College leh Champhai College-te a ni.

MSLSA hotute chuan, thubuai nei, Court-ah ngaihtuah mek leh la chinfel loh vanga jail-a táng mek zingah, court-in thiam loh chantir pawh ni se, na taka hrem leh rei tak tàntir theih ni lote an awm fo tih an sawi a; chutiangah chuan court-in thubuai a chinfel mai si loh vanga an tan tur aia rei tâng tawhte pawh an awm fo tih sawiin, chutiang mite chu jail-ah leh court-ah an buaipui ṭhin tih an sawi bawk.

Legal Aid Clinic dinhmun

District Clinic PLV zat

Aizawl 21 24

Lunglei 11 21

Siaha 3 9

Champhai 22 39

Kolasib 8 16

Serchhip 7 17

Lawngtlai 7 13

Mamit 18 31