2018 Sunday school kai ṭan

Nimin, Pathianni kha kum 2018-a puitling leh naupang sunday school kai ni hmasa ber a ni a, kohhran tam ber chuan pawl siam rem leh hming ziah ni atan an hmang.

Kuminah hian Presbyterian Kohhran chuan puitling sunday school-ah Rev.Dr K Lallawmzuala ziah, 'Chronicles I & II Hrilhfiahna' an zir dawn a, zirlaibu copy 80,000 chhut a ni. Zirlaibu hi Mizoram Synod chuan Presbyterian Church of Myanmar (PCM) hnuaia Phai Synod pumpuiah an zir ve dawn avangin bu 1,000 vel an pe a ni.

Puitling sunday school-ah vek hian Baptist Church of Mizoram chuan Rev. Joe Laldinpuia ziah 'Joba Hrilhfiahna' an zir dawn a; Salvation Army-in Lt. Vanlalhriata ziah Chanchin Ṭha Matthaia, UPC (NEI)-in Rev. C Zohmingthanzama ziah Jakoba, Petera leh Johana bu, UPC (Mizoram)-in Upa F Lalremmawia ziah Korinth I & II Hrilhfiahna an zir ang.