Bawlhhlawh paih motor 54 chungchanga SIPMIU leh AMC hotute thu rel dan

Mizoram sorkar hnuaia SIPMIU-in Asian Development Bank (ADB) aṭanga sum hmuh hmangin Aizawl khawpuia bawlhhlawh paihna tur motor 54 a lei a, motor-te chu contractor kuta hlan turin July 20, 2017-ah Aizawl Municipal Corporation (AMC) Deputy Mayor hoa ṭhukhawmin an rêl. Motor-te chu Mizoram sorkar (SIPMIU)-in October 2, 2017-ah AMC kutah a hlan a ni.

Bawlhhlawh paihna motor 54 zinga 25-in New Delhi a thlen tirha enfiah turin SIPMIU-in AMC Commissioner hnenah February thlaah ziakin ngenna a thawn niin SIPMIU hotute chuan an sawi a, "Mumbai aṭangin New Delhi-ah motor thar 25 a thleng a, chumi enfiaha kal turin February 28, 2017-ah AMC Commissioner hnenah sawmna kan thawn a, chhanna kan hmu lo," an ti.

Hemi chungchangah hian AMC mayor PC Lalhmingthanga chuan zawhna chhangin, "SIPMIU lehkha kha councillor-te'n kan sawiho a, motor endik tur hian SIPMIU official-te an kal dawn tho avangin kan ring tawk a, councillor-te chu inrawlh ṭul kan ti ta lo a ni," a ti a; SIPMIU chu a tir aṭangin motor lei leh tender chhuah thlenga ruahmanna neitu an nih avangin an ring mai niin a sawi.

SIPMIU programme director Valbuanga'n AMC Commissioner hnena lehkha a thawn hi February 28, 2017-ah a ni a, motor 24-in New Delhi a thlen thu leh endik turin AMC aṭangin official pakhat, senior driver pakhat emaw mechanic emaw hruai tel turin lehkhaah ziah a ni.

AMC ráwn loa motor pek nia sawi chungchangah SIPMIU hotute chuan, AMC pian tirh, AMC Commisioner hmasa ber a awm laiin an project, 'Municipal Solid Waste Resource Management System for Aizawl City' chu AMC hnenah an hriattir tawh niin an sawi. SIPMIU Programme Director chuan, "AMC sorkar hmasaa councillor-te nen SIPMIU office-ah kan meeting fo a ni," an ti a; AMC sorkar kal lai nena meeting-ho an harsat deuh ṭhin nia sawiin, a pawi an tih thu an sawi.

Hetih lai hian, July 20, 2017-a AMC Conference Hall-a meeting-ah AMC deputy mayor Lalringliana hoin councillor 11 an tel a, Mizoram Pollution Control Board (MPCB) member secretary, PHE leh UDPA aiawh te, SIPMIU Programme Director leh Sanitation officer-te an tel bawk.

Meeting minute-a a lan danin, bawlhhlawh paih motor hman dan tur te, Municipal Solid Waste Resource Management System for Aizawl City hnuaia hna thawh dan te, contractor kuta bawlhhlawh khawn leh paih hna hlan chung­chang leh, thil pawimawh dang eng emaw zat an rel a ni.

Bawlhhlawh paih motor chu a bik taka siam, a taksa (body) pawh phui tura tih a ni a; Supreme Court-in a din National Green Tribunal-in bawlhhlawh phurh/paih nan motor remchang apiang hman a rem loh thu a chhuah leh hma a lâk mek thu te, bawlhhlawh paihna atan motor tê (LMV) hmang local council (LC) pariat, 407 truck hmang LC 33 leh LMV & MMV hmang kawp veng 42 an awm thu leh ADB aṭanga motor 54 lei chu hman ṭangkai dan turte an chuang.

Aizawl bawlhhlawh sawngbawl tura SIPMIU-in project a neih - Municipal Solid Waste Resource Management System for Aizawl City a buaipui thu leh project component chhungah thil 7 kalpui tum a nih thu leh, chu'ng zing aṭang chuan bawlhhlawh bâwm sem, bawlhhlawh paih motor lei leh sanitarty landfill-te chauh an la kalpui rih thute a chuang bawk.

Aizawla motor kalna remchang thei tur route plan siam ni se, motor pakhat pawh daihzâi zawka hman theih beiseiin AMC ward hrang hrangte chu category palia ṭhen an rel a; category tinah route plan mumal siam a nih chuan motor 50 (MMV)-in ni khatah vawi hnih tal an kal chuan Aizawla bawlhhlawh chu paih zo thei turah an beisei a ni.

July 20, 2017-a thurel 4.2.-ah chuan, "Ward tinah bawlhhlawh khawn khawm leh a paih hna thawk turin contractor thlan ni se, motor sem zai dan tur pawh ward huam chhung area leh population anga chhût ni se,' tih a ni a; LC hnena motor pek a nih dawn chuan an mamawh dan a inan vek dawn avangin lottery system-in pek tur vengte siam an rel bakah, a rate turte an bithliah fel a, trip khat chu Rs. 800-1,400 tho ni se, an ti.

SIPMIU-in project an siam dawna an zir chian dan chuan, Aizawl khawpuia bawlhhlawh chu ni khatah metric ton 160 vel a ni a; kum 2020-ah chuan ni khatah metric ton 188 a nih an rin laiin, kum 2017-ah house to house campaign aṭangin ni khatah 170 metric ton a ni tawh niin an tarlang.