Governor leh MKHC hotute an inkâwm

Governor Lt.Gen. Nirbhay Sharma sàwm angin Mizoram Kohhran Hruaitute Committee (MKHC) hruaitute chu January 5, Zirtawpni tlai khan Raj Bhavan-ah an leng a; Governor nen inkâwmin, thil pawimawh hrang hrang an sawiho.

Larsap Nirbhay Sharma chuan, MKHC hruaitute'n khawtlangah dinhmun pawimawh tak an luah thu sawiin, "Mizoramah hmasawnna ruhrel tam tak din a la nih dawn avangin, ram páwn aṭanga hna thawk an lo luh ai chuan, ṭhalaite ku thnathawh zahawmzia kan inzirtir nawn a ngai a ni," a ti.

Mihring zat aṭanga tehin Mizoram chu India rama cancer vei tamna ber a ni chu pawi a tih thu sawiin Larsap chuan, ruihhlo, zûk leh hmuam laka mipui an fihlim theihna tura hma lakpuiah a sáwm a; Chite lui humhalhna tura hmalaknaah pawh thláwp turin MKHC chu a ngen a ni.

MKHC hruaitute chuan, kumin inthlan lo awm tur chu dik leh muanawm taka neih a nih theih nan political awareness buatsaih an tum thu an sawi a; Mizo mipuiin kut hnathawh an hreh loh thu leh kut hnathawka eizawngtute pawh an pun zel thu an sawi bawk.

MKHC hruaitute hi an chairman thar Rev. F Lalrinnunga, Synod moderator hoin Raj Bhavan-ah hian an kal a ni.