Study Team-in 7th. Pay an zir mek : Hun tiam chhunga zawh hman an tum
7th. Pay zir chiang tura Mizoram sorkarin a din Study Team chairman H Liansailova chuan, 7th. Pay an zir chian mek thu a sawi a, "Hun tiam chhungin kan peih hman ang," a ti.
Vanglaini palai zawhna chhangin H Liansailova chuan, Study Team hi December 2017 khan ṭum hnih an ṭhutkhawm thu sawiin, "Finance department lamin data leh information kan duh angte min la pe kim thei lo a, January 20, 2018 hma chuan min pe kim hman turin kan hriattir a ni," a ti a; data leh information an duh ang an hmuh kim hunah an ṭhutkhawm leh tur thu a sawi.
H Liansailova chuan, state dangin 7th. Pay an kalpui dan an zir chian tel thu sawiin, "State dangin 7th. Pay an hmannaa document pawimawhte pawh kan la khawm zel a, mahse, state tam tak chuan document an nei mumal lo," a ti.
Study Team hi November 13, 2017 khan din a ni a, thla ruk chhunga an report thehlut tura tih an ni. H Liansailova chuan, "Thil harsa lutuk a awmin ka ring lo. Hun tiam chhungin report hi kan thehlut hman ang," a ti a; information leh data an duh angte an neih hunah chuan report an peih thuai a beisei thu a sawi.
H Liansailova sawi danin, 7th. Pay hman tur chungchangah hian sorkar laipuiin Goods & Service Tax a kalpui danin nghawng a nei dawn a, chuvang chuan chumi chungchang pawh chu zirchian a ni dawn a ni.
October 25, 2017-a Council of Minister thutlukna angin Study Team hi din a ni a, anni hian report an thehluh hunah Cabinet-in a zir chiang leh ang a, zir chian a nih hnuah report kalphung azirin sorkarin thutlukna a siam ang.
Study Team-ah hian member secretary chu Taxation secretary Vanlalchhuanga a ni a, member-te chu - minister of state KS Thanga leh Finance secretary hlui Lalthansanga te an ni.
April 28, 2017 khan Finance minister Lalsawta chuan Pay Commission report chu Mizoram sorkarin kum thum vel hnuah a zawm ve ṭhina a hriat thu a lo sawi tawh a, "Tun maiah chuan Mizoram sorkarin a hmang ve nghal mai dawn em tih sawi mai theih a ni lo. 7th. Pay hi kan la hmang ve tho turah ka ngai a, mahse, a hun tur erawh sawi theih a ni lo," a ti.