Tualthattu khai hlum phût nawn

Republic Veng Joint Action Committee (JAC) chuan thuchhuah inṭâwm siamin, January 9, 2015-a an veng mi Sangliansiama te chhungkuaa mi panga thattu Laltlanchhuaha s/o Parzuala, Republic Veng chu khai hlum ngei ni se an duh thu an tarlang nawn.

Local Council, YMA, MUP, MHIP leh VDP telna Republic Veng JAC chuan, January 9, 2015-a an venga pawisawi lo mi panga râwng taka thah a nih champha a lo thlenin, an khawtlang chu an rilru a nat thar thu an tarlang a, "Pu Sangliansiama te chhungkaw tawrhna hi kan theihnghilh tawh dawn lo. Râwng taka mi panga lai mai that a, naupang rilru thianghlim tak pawh zuah loa hmelma ang maia diriam taka nghaisatu Laltlanchhuaha chunga kan thuchhuah tawh 'he tualthattu hi khaihlum ni rawh se' tihah hian kan la ding nghet tlat a ni," an ti.

Republic Veng JAC chuan, Lal­tlanchhuaha chu Republic Veng khua leh tui a nihna an hlihsak a, a thiin emaw, a nung chungin emaw Republic Veng veng chhungah lak luh an remti lo tih an sawi nawn a; tualthahna rapthlak tak chungchangah dik taka rorel a nih theih nana dâltu an awm chuan Republic Veng khawtlangin a ṭul anga an hmachhawn zel tur thu an tarlang bawk.