Aizawl khawpuiah kum 2017 chhungin Traffic police-in motor 13,874 an man

Traffic police-te chuan December 2017 chhunga Aizawla Zero Tolerance Drive an kalpui chhungin dan zâwm famkim lo lirthei 1,832 an man a, chu'ng lirthei neitute sum chawi tlingkhawm chu Rs. 7,24,100 a tling. Hetih lai hian, kum 2017 chhung khan Aizawlah lirthei 13,874 an man.

Inngaihdamna tel loa lirthei dan zâwm famkim lote enfiah leh mante dan danga pawisa chawitir hun, Zero Tolerance Drive hi nikum December 11 khan Aizawl khawpui chhungah kalpui ṭan a ni a; traffic police-te chu khawpui chhung hmun hrang hrangah duty-in, lirthei leh lehkha pawimawhte an endik a ni.

Traffic police hotute hnen aṭanga thu dawn danin, Zero Tolerance Drive chhunga dan zawm kim lo lirthei man 1,832 zinga a tam ber chu two wheeler a ni a, 1,309 man a ni. Ke pali nei lirthei tê chi (LMV) 407, taxi 83, truck (HMV) 21 leh bus 12 an man bawk.

Kum 2017 chhung khan Aizawl City Traffic Police chuan lirthei 13,874 an man a; lirthei an mante chu a chi hrang hrang a ni a, chutih laiin, ke pali nei lirthei laihâwl, medium motor vehicle (MMV) man an nei lo.

January-December 2017 chhunga traffic police-te'n lirthei an man zingah two wheeler tam berin, 8,676 an man a, a dawttu chu LMV niin, 2,828 an man. Lirthei dang an mante chu - taxi 1,664, HMV 560, bus 141 leh lirthei chi dang panga a ni.

Kum 2017 chhunga dam zâwm lo lirthei man tam ber thla chu October a ni a, lirthei 2,069 an man. Lirthei man tlem ber thla chu February a ni a, dan zâwm lo lirthei 724 an man a ni.

Vanglaini zawhna chhangin Traffic SP C Lalthanmawia chuan, motor man zinga two wheeler a tam bik chhan chu - Aizawlah lirthei dang aiin two wheeler a tam fâl bik bakah, a khalhtute zinga la naupang tak tak, hawklak rual, mawhphurhna la hre tâwk lo leh dan ngaih pawimawh nachâng hre lo an tam vang nia a hriat thu a sawi.

Traffic SP sawi danin, July 2017 thlenga Aizawl District Transport Officer (DTO) aṭanga report an dawn ang chuan, July 2017 thleng khan Aizawlah two wheeler 80,184 a awm a, chu'ng zinga 78,899 chu mimalin an lei niin, 1,285 chu sorkarin a lei a ni.

C Lalthanmawia chuan, October 2017 aṭanga Aizawla lirthei indin chhâwk kalpui ṭan chu traffic jam tihziaawm nan nachhâwkna ang chauh a nih thu sawiin, "Traffic jam chinfel hlenna a ni lo," a ti a; traffic jam tihziaawm zel nan kawng dang zawn zel a ṭul thu leh, rawtna an neih tawhte pawh sorkaran an thlen tawh thu a sawi.

Traffic SP chuan, mi hausate'n ni tin an tlan chhuah theih nan motor an lei belh thei a, lei belh pawh an awm ṭeuha an hriat thu sawiin, mi hausate'n motor an lei belh zel tur khuahkhirh nan registration-ah emaw dan khirh zawk siam a ṭul thu a sawi a, "Khawng deuha dan kalpui a ṭul a, tun ang renga kan kal chuan, intlân chhâwk hi ti mah ila, nakin lawkah kan la ding leh ṭhuap tho dawnin a lang," a ti.

Traffic SP sawi danin, Aizawlah ni tin lirthei 80,000 - 90,000 inkar che vêl ang a ni a, Aizawl khawpui chhung kawngpuite hi km. 297.6 anga chhût niin, km. 1-ah lirthei 300 vel zel awm ang a ni. Aizawlah khawlaia duty traffic police 170 vel an awm a, traffic police pakhatin lirthei 400 vel enkawl zel ang an ni.