Kan inthlang vat lo ang tih a sawi theih loh - Chief Minister

Chief minister Lal Than­hawla chuan, sorkar laipui sor­karna chang mek BJP an hmanhmawh avangin MLA inthlan hun ruat vat a ni lo ang tih a sawi theih loh thu a sawi.

Congress Bhavan chu nimin khan kum 2018 atan hawn a ni a, Lal Thanhawla'n thu sawiin, "BJP-te hian inthlan hmanhmawhna riau an nei a, an uaithla leh mai ang tih an hlau. Chak nia an inhriat laia inthlan an duh a, kumin kum tawp lama inthlang tur state pali/pangate hi kan inthlang burh lo ang tih a sawi theih loh," a ti.

Chief Minister chuan, BJP-te chu Constitution tihdanglam duh hial an nih thu sawiin, "An naute'n Constitution tihdanglam an duh thu hi an sawi chhuak a, mahse, an inkhap hram hram a ni," a ti a; Constitution tihdanglam chungchang sawitute'n an pute rilru an sawi chhuah thu a sawi.

Mizoram BJP-te pawh an theih ang anga an ṭan thu sawiin Lal Thanhawla chuan, "MLA pakuate chu lak luh leh thil neih inmil lo chungchangah min hêk a, tunah hian ACB kutah a awm mek. Engtin nge an tih dawn ka hre lo. Hetiang hi Election Commission of India-in an ngai thutak ngai lo a, Court-ah pawh an chak ngai lo," a ti.

Lal Thanhawla chuan, nikuma President leh Prime Minister-in Mizoram an rawn tlawh ṭumin Mizoram sorkar sawiselna tur an hriat loh thu sawiin, "President chuan House-ah thu a sawi a, kan House kalphung bakah remna leh muanna chungchangah min fak a ni. Prime Minister pawhin sorkar demna leh duhkhawp lohna a sawi lo," a ti a; Mizoram BJP-te'n Mizoram sorkar an hêknain awmzia a nei lo niin a sawi.

Chief Minister chuan, dam taka kum thar hruai thlengtu Pathian hnenah lawmthu sawi tur a nih thu sawiin, "Mar páta hna thawh tur a ni. Kumin hian tluang taka hna kan thawh theihna atan inlungrual taka kal a pawimawh," a ti.