Chief Minister-in SRDC office a hawng
Chief Minister chuan, SRDC office chu a sakna sum cheng nuai 45 nen a inmil ṭhaa a hriat thu sawiin, nakin zelah pawh SRDC chhunga hnathawh tur dang hrang hrang
la awmte chu sum milin a ṭhat zui zel a beisei thu a sawi a, chutianga thawk zel turin kalkhawmte a chah.
SRDC chairman L Thangmawia, Lengteng bialtu MLA chuan, SRDC chu Sialkal tlangdunga chengte tihhmasawnna tur a nih angin, eirûkna tel loin rinawmna leh thawhrimna nena kalpui a nih tur thu sawiin, “SRDC fund hi sum siamna remchang atana hman chi a ni lo a, hmalaknate chu party emaw, zarzo tuma ṭangkaipui tum chi a ni lo,” a ti a; hriselna leh zirna lam te, mihring tihhmasawn kawngahte SRDC chuan hmasawnna a thlen ngei a beisei thu a sawi.
Pisa hawnna inkhawm hi SRDC member leh Champhai North bialtu MLA Dr ZR Thiamsanga’n a kaihruai a; Chief Minister-in ‘Profile & Achievement of Sialkal Range Development Council’ tih lehkhabu a tlangzarh.
SRDC hi February 24, 2012-ah Development Board anga din a ni a, September 24, 2013-ah SRDC tiin thlak a ni. Assembly constituency pahnih - Lengteng bial Ieh Champhai North biala khaw paruk - Mímbung, Hrianghmun, Teikhang, Kàwlbêm, Selàm leh Vaikhawtlang-te a huam.
Kum 2012-a din a nih aṭangin sorkarin kum tin cheng nuai 50 a pe ṭhin a, sum chu council chhunga hna hrang hrang thawh nana ruahman a ni. kum 2017-18 khan kum danga fund hmuh ṭhin bakah, NEDP Special Package aṭangin cheng nuai 50 pek belh a ni a, chu sum hmang chuan SRDC headquarter office tur Mimbung khuaah sak a ni. Council budget chu kum 2019-20 financial year aṭangin cheng nuai 200-ah tihpun leh a ni bawk.
Mimbunga head-quarters office bakah, Aizawlah SRDC Cell Office siam a ni bawk a, May 28, 2019 khan Venghluiah Chief Minister-in a hawng a ni.