Swachh Survekshan 2018 hnuaiah January 12-ah Lunglei endik dawn

India rama khawpui fai inelna, Swachh Survekshan hnuaia Lunglei khawpuia hmalak tawh leh hmalak zel dan tur ngaihtuahin nimin khan UDPA officer Andrew Lalhruaia hoin a pisaah meeting neih a ni a; UDPA hotute leh Lunglei MJA hruaitute an tel. Lunglei khawpui hi January 12, Zirtawpni-ah Central team-in an endik dawn a ni.

Andrew Lalhruaia chuan, Swachh Survekshan inelnaah Lunglei a tel tih sawiin, UDPA-in Lungleiah theihtawp chhuahin kawng hrang hranga hma an lak mek thu a sawi a; Lunglei khawpui dinhmun chu Central team-in January 12, 2018-ah an endik tur thu sawiin, faina leh thianghlimna kawngah nasa zawka ṭan lak a ṭul thu a sawi.

Swachh Survekshan 2018 hma­chhawn tura inbuatsaihnate sawiin Andrew Lalhruaia chuan, zana hmun phiah fai (night sweeping) ṭan a nih tawh thu te, Lungleia zirna-in hrang hrangah faina chungchang inzirtirna hun hman a nih tawh thu te, sikul tinah faina lama hma latu tur committee din kim a nih tawh thute a sawi.

Lunglei mipuiin faina leh thianghlimna kawnga ṭan an lak theih nan mobile concert leh kawngzawhna buatsaih a nih tawh thu te, Lunglei High Powered Committee (HPC) sum hmangin khawpui chhung chei thar mek a nih thu te, kohhran hrang hrangah faina chungchang inzirtirna nei tura ngenna an thlen tawh thu te, V/C tinte hnenah an huam chhungah ṭheuh uar taka faina leh thianghlimna chungchang puangzar tura ngenna an thawn tawh thute a sawi bawk.

Meeting-ah hian UDPA department-a thawkte leh Lungleia mihring pungkhawm tamna Super Market, AOC, Rahsi Veng leh Tlabung pênga dawrkaite leh sumdawngte nen faina hnatlang neih tum a nih thu an sawi a ni.