2017 chhungin ruihhlo vangin Mizoramah mi 65 an thi
Kum 2017 chhung khan ruihhlo vangin Mizoram pumah mi 65 an thi a, kum 2018-ah ruihhlo vangin mi pakhat a thi tawh bawk.
Excise & Narcotics department chhinchhiah danin, kum 2017 chhunga ruihhlo vanga nunna chan mi 65 zinga 53 chu mipa an ni a, mi 12 chu hmeichhia an ni. Ruihhlo vanga thite'n an thihpui tam ber chu heroin a ni a, mi 28-in an thih phah a; mi dang zawng chu ruihhlo hrang hrang vanga thi an ni.
Kum 2018-ah pawh chawlhkar khat chhungin ruihhlo vangin mi pakhat a thi tawh a; chu chu mipa niin, heroin leh ruihhlo dang tih pawlh vanga thi a ni.
Hetih lai hian, Excise & Narcotics department-in ruihhlo vanga thi an chhinchhiah ṭan hun, kum 1984 aṭanga nimin (January 9, 2018) thlengin ruihhlo vanga thi zat chu mi 1,468 an ni a, mipa 1,305 leh hmeichhia 163 an ni. Ruihhlo vanga thite'n an thihpui tam ber chu proxyvon/parvon spas niin, mi 1,167-in an thihpui a ni.