Khawlai chei mawi ber - Tlangnuam

Urban Development and Poverty Alleviation department chuan nimin khan UDPA minister Zodintluanga pisaah kum 2017 Krismas puala khawlai chei zinga a mawi leh ṭha zual an thlante hnenah lawmman an hlan a; kâwn/khawlai chei mawi berah Tlangnuam thlan a ni.

Khawlai chei mawite lawmman hlan inkhawm hi UDPA secretary Dr C Vanlalramsanga'n a kaihruai a; minister Zodin­tluanga chuan, mipui náwlpuiina an lenvahnaa hmuhnawm en tur an neih theih nana veng ṭha­hnemngaiten an veng chhung an chei ṭhin chu lawm­awm a tih thu a sawi.

Zodintluanga chuan, khawlai chei mawite hnena lawmman pek a nih tur thu chu puanzar lâwk vak a nih loh thu sawiin, "Lawmman siam a nih dawn loh pawha kawn chei ṭhinte hi a lawmawm a, lawmman beisei loa cheite hnena lawmman pek hi a ṭha kan ti a ni," a ti a; lawmman dawngte chungah lawmthu sawiin, kum 2018 Krismas-ah pawh Aizawl chu mi zawng zawngin an sawi theih nan chei zel turin Aizawl mipuite a sáwm.

Khawlai chei mawi bera thlan Tlangnuam-in Rs. 1,00,000 an dawng a; pahnihnaah Chaltlangin Rs. 70,000 leh pathumna Durtlangin Rs. 50,000 an dawng. Mission Veng (Sikulpuikawn), Republic Vengthlang leh Electric Veng ten consolation prize Rs. 20,000 ṭheuh an dawng bawk. Lawm­mante hi UDPA Minister Zodintluanga'n a hlan a ni.

Khawlai chei endik dan sawitu UDPA Joint Director chuan, Aizawla local council zawng zawng chu khawlai chei lawmman siam a nih tur thu an hriattir thu leh, competition chuan December 24, 2017 leh January 2, 2018 inkar a huam thu a sawi. Veng/hmun 11 an endik a, a endiktute zingah UDPA officer-te bakah, Central YMA leh MJA aiawh an tel thu a sawi bawk.

Khawlai chei endik­naa an tehfungte chu - faina lam kaihhnawih, remhriatna (creativity), a mawina leh cheina hmanrua (eco-friendly decoration), mipuiin an hlut dan, a tlawhtute an lo dawnsawn dan (hospitality) leh, a theme (eng hawi zawnga chei nge) tihna a ni.