KHAWTHLIR

Lei dawhna tur
Lawngtlai DC Office chuan National Bank for Agriculture and Rural Development (NABARD) hnuaia Rural Infrastructure Promotion Fund (RIPF) aṭangin an district chhung hmun hniha thing lei (wooden bridge) dawhna turin cheng nuai10 an dawng. Lei hi Parva II leh Parva III aṭanga Parva I leh Parva IV kainaah leh, Hmawngbuchhuah leh Dumzautlang inkara Sekulh luiah te dawh a ni ang.

Zofa Unity
Zofa Global Network (ZGN) chuan vawiin hian New Sangbar, North Cachar Hills, Assam-ah Zofa Unity Seminar & Cultural Meet an buatsaih dawn. He huna tel tur hian Mizoram aṭangin ZGN hruaitu te, cultural troupe-te leh zaithiamte'n nimin khan Aizawl an chhuahsan a ni.

Study tour
New Economics Development Policy (NEDP) hnuaia study tour nei tur Hrangturzo constituency chhunga MUP member 20-te chu nimin khan Serchhip aṭangin IPRO Saitluanga'n IPR pisa tual aṭangin a vai liam. MUP member-te hi Aizawlah IPR department-te'n lo dawngsawng a, hmun thlan bik an tlawhpui dawn a ni.

CM relief fund
Mizoram Civil Pensioners' Association (MCPA) chuan mi harsa zualte ṭanpuina turin tun hnai khan Chief Minister's Relief Fund-ah Rs. 50,000 an chhung lut.

Transformer chhia
Champhai district leh Mizoram khawchhak lam hmun danga kawlphetha pekna, Saituala 132 KV Sub Station-a transformer lian chu a chhia a, hei vang hian Mizoram khawchhak lam hmun hrang hrangah tunlai hian kawlphetha an hmu ṭha thei lo. Transformer chhe thlakna atan hian Zuangtui 132 KV Sub-Station-a transformer hman tum a ni a, metric tone 30 chuanga rit a nih avangin a phurh theihna chi motor lian ngaihtuah mek a ni. Power & Electricity department hotute chuan, an harsatna tawh chu hrethiam turin mipui an ngen.