PUC, ATC, AICS leh HATIM-ahte Zero Waste Management kalpui dawn

UDPA minister Zodintluanga chuan Aizawl leh Lungleia zirna-in palia bawnghlawh sawngbawlna tur siamna tur, Zero Waste Management project work order chu nimin khan zirna-in hotute hnenah a pisaah a hlan. Minister chuan, faina lamah Mizoram pum an ṭang tih sawiin, "State fai ber nih kan tum a, kan inpuahchah mek a ni," a ti.

Zero Waste Management project kalpui­na tur hi Mizoramah a vawi khatna a ni a, New Economic Development Policy (NEDP) hnuaia ruahman a ni. A enchhinna atan Pa­chhunga University College (PUC), Aizawl Theological College (ATC), Academy of Integrated Christian Studies (AICS) leh Higher & Technical Institute of Mizoram (HATIM)-ah kalpui a ni dawn a; Rs. 15,00,000 ṭheuh pek a ni.

UDPA Minister chuan, Mizoram chu India rama state fai ber a nih theih nan inpuahchah mek a nih thu sawiin, "Aizawl phei chu khawpui fai ni turin dan kan siam tawh a, Assembly-ah pawh pharh a ni tawh. Khawlaiah chil chhâk leh bawlhhlawh paih mai mai phal a ni dawn lo," a ti a; chuta tan chuan NSS volunteer-te hman ṭangkai tum a nih thu a sawi.

Zodintluanga chuan, Aizawl khawpui faina chungchanga dan siam thar tur kalpuitu (implement-tu) tur chu Aizawl Municipal Council a nih thu a sawi rualin, AMC tan a harsat mai theih thu a sawi a, "Tunah pawh bawlhhlawh paih lamah harsatna a awm deuh a, SIPMIU aṭanga motor 54 pek chauh chuan a indaih lo a, motor 54 pekte hi bawlhhlawh chak leh ṭha zawka paih theih nan a thlawna pek ni mah se, tunah chuan bawlhhlawh paih lamah harsatna a awm ta zawk a. Hemi chungchang hi politics ball-ah ṭhenkhatin an hmang a, a pawi hle a ni," a ti.

Zero Waste Management project chu PUC, ATC, AICS leh HATIM-ah ṭan a ni dawn tih sawiin UDPA Minister chuan, "An campus chhungah bawlhhlawh an sâwngbâwl dawn a, ṭawih thei hman ṭangkai dan, ṭawih thei lo phûm bo dante an ngaihtuah dawn. A bul ṭanna a ni a, thil ṭha leh hlawhtling tak a nih chuan veng leh khuaahte pawh kalpui zel dan a awm thei ang," a ti a; project peih a nih hunah chuan zirna-in pali campus chhung aṭangin bawlh­hlawh a chhuak tawh lo tura ngaih a nih thu a sawi.

Inkhawm kaihruaitu, UDPA secretary Dr C Vanlalramsanga chuan, Zero Waste Management project tum bulpui chu, 'Zirna-in campus aṭang­in bawlhhlawh a chhuak tur a ni lo a, an hmunah anmahni'n bawlhhlawh sawngbawlna an siam ang a, bawlhhlawh an tirîral ang,' tih a nih thu a sawi.

UDPA Secretary sawi danin, Zero Waste Management project chu contractor emaw, sorkar department emawin an thawk dawn lo a, institution-in an thawk ang a, a neitu nihna pawh an nei nghal ang. Project hi thla ruk chhunga zoa hman tura beisei a ni.