Social media hman chin tâwk neih a ṭul - Vanlalawmpuii

MZP headquarters, Biate chuan nimin khan Zialung Community Hall, Biate-ah an kum 60-na, diamond jubilee an lawm a; khuallian, minister Vanlalawmpuii Chawngthu chuan, social media hman kawngah chin tâwk neih a ṭul thu a sawi.

Vanlalawmpuii Chawng­thu chuan, zirlai nih chhung chuan lehkha chhiar tam a pawimawh thu sawiin, "Social media hman kawngah chin tâwk neih a ngai. Thu dik leh dik lo thlifim thiam a, belhchian dâwl lo thehdarh loh a pawimawh. Zo hnahthlakte chu a takin awmho thei rih lo mah ila, rilru hmun khat pu chung zela kan thawhho a ngai a ni," a ti.

Jubilee lawm inkhawm hi Biate MZP president H Laldinpuia'n a kaihruai a; diamond jubilee pual­a souvenir an buatsaih chu Bialtu MLA hian a tlangzarh. Zirlai, khaw­tlang hruaitute leh MZP hruaitute an tel a, tlaiah chawhlui an kîlho a ni.