NIB enkawl turin UN office hlan a ni

NLUP Implementing Board (NIB) chuan Aizawla UN Programme Coordination Office an enkawl chhunzawm dawn a; pisa enkawl hna inhlanna inkhawm nimin khan NIB conference hall-ah neih a ni.

NIB chairman JH Roṭhuama, MLA chuan, NIB kuta UN Programme Coordination Office hlan chhawn a ni chu UNO leh Mizoram sorkar thawhhona bung khatna khârna a nih thu a sawi a, "Bung hnihna keu leh thuai a nih dawn. Kawng hrang hrang­a thawhho chhunzawm zel a ni ang. UN Agency-te'n Mizoram an rawn zawn chhuahna leh Mizoram sorkar hotute ṭan lakna ropui a, kum thum chhungin UN Joint Initiative Project aṭangin thil ṭha tam tak zir chhuah a ni," a ti.

NIB vice chairman PL Thanga chuan, UN Joint Initiative Project pian chhuah dan leh Mizorama an luh dan a sawifiah a, "Bung khatna zawh a ni a, a bung hnihnaah kan lut dawn a, he hun kan thlen theihna tur hian Mizoram sorkar hotute leh line department hrang hrangte an thawkrim em em a, an thawhrim rah a ṭha zawngin Mizoramin a têl

ṭan mek a ni," a ti a; Mizorama UN hmalaknate'n belh­chian a dâwl thu a sawi.

Office inhlan chhawnna lehkha hi UN aiawhin UNDP coordinator Rinzuala'n hming a ziak a, NIB aiawhin secretary James Lalrinchhana'n a ziak thung. UN Programme Coordination Office enkawl chhunzawm zel dan tur chu Chief Minister hoa la rel leh tur a ni.

Mizoram sorkar leh UNO peng palite thawhhona thuthlung hi October 16, 2014-ah ziah a ni a, thawhhona hi kum thum (2014 – 2017) atana ruahman a ni. UN hnuaia pawl pali - United Nations Development Programme (UNDP), Food & Agriculture Organisation (FAO), United Nations Industrial Development Organisation (UNIDO) leh United Nations International Labour Organisation (ILO)-te an tel.

Ruahman angin tluang­ takin project kalpui a ni a; UN agency-te hian Mizoram hmasawnna atana ruahmanna an siam leh hmathlir an neihte Mizoram sorkar bawhzui tura an thehluh hnuah, December 31, 2017 khan project tihtawp a ni.